श्रीरामायणरहस्यचिंतन

श्रीरामायणरहस्यचिंतन

राजा दशरथ नीतिमंत तो बलशाली होता

कौसल्या शालिनी सुशीला त्याची पतिव्रता ! १

त्यांच्या उदरी यत्नरूप अवतरे प्रभू राम

लक्ष्मण आला शक्ति घेउनी बंधू गुणधाम ! २

भरताच्या मनि बंधुप्रीती सरलहृदयता ती

अनुकरणे शत्रुघ्न धन्य हो बालक शुद्धमती ! ३

सत्यरूप सीतेने वरिले श्रीरघुनाथाला

धरती उल्हासाने भेटे जैसी गगनाला ! ४

कांचनमृगमोहाने फसली व्याकुळली सीता

अहंकाररावणे झडपली संधी सापडता ! ५

श्रीरामाच्या नामस्मरणे कल्याणच झाले

भक्तिरूप हनुमंते पतिचे कुशल सर्व कथिले ! ६

अहंकार दैत्याला वधिता सफल रामकार्य

रामायण सांगते मानवा पणा शौर्य लाव ! ७

यत्ना अंती यश ठरलेले विनम्रता भक्ती

या देहातच मुक्ति लाभण्या सापडते युक्ती ! ८

अशांत लंका शांत अयोध्या पोचावे तेथे

विकारवादळ चित्तामधले नीतीने शमते ! ९

नीती सुटता विटंबना ती पदोपदी होते

सांगे भारत उभ्या जगाला 'सत्यमेव जयते' ! १०

कुटुंबनीती हे रामायण पारायण करणे

सौहार्दाने सामर्थ्याने नारायण बनणे ! ११

सेवाभाव नि टापटीप ती काय कमी येथे

गृहलक्ष्मी ही संस्कारांनी घर मंदिर करते ! १२

श्रीरामाची कथा ऐकता जाणू भावार्थ

शिकता शिकता कथा पसरवू पाची खंडात ! १३