काकड आरती गाऊ स्वामी समर्था..

काकड आरती गाऊ स्वामी समर्था
स्वामी समर्था हो दत्ता अवधूता!ध्रु.

तण अभिमानाचे उपटावे
आसक्तीचे नाव नुरावे
नामस्मरणे मन पवनाला द्या जोडुन आता!१

गृहस्थ असुनी घडते भक्ती
नीतिबंधने जीवन युक्ती
प्रभातकाली तनामनाने वंदू समर्था!२

बसल्या जागी यात्रा घडते
स्वामीदर्शन अवचित होते
आनंदाश्रू ओघळती हो अनुभव हा येता!३

देहच मी भ्रम जळून जावा
भवभीतीने पळ काढावा
पराक्रमाची वाढो ईर्षा पुरुषार्था करिता!४

सुधारणा हो माझ्यापासुन
पालट व्हावा स्वामी आतुन
मने मनाला द्या द्या जुळवुन स्वामी समर्था!५

रचयिता : श्रीराम बाळकृष्ण आठवले