ना प्रभू दे अंतर

चालणे चालूच ठेवा
चढ असो वा उतरण
साधणे संवाद जमवा
गोड गाली हासुन !१

नाम घ्यावे गुणगुणावे
तुष्ट व्हावे ऐकुन
वेळ लागे सार्थकी हा
दिवस सारा शुभ दिन !२

देव सारे भेटताती
चालणारे बोलते
कुशल सारे सांगताती
मोकळे बहु वाटते !३

जे दिसे ते देव समजा
सृष्टि माता आपली
टेकड्यांची चढण छोटी
कौतुकाने हासली !४

चांगले जर कथन केले
लाभते प्रोत्साहन
संत उत्सुक सांगण्याला
अल्पमोली बहुगुण !५

मागणे काहीच नाही
सांगणे ना फारसे
हा असा श्रीराम भेटे
भाग्य का थोडे असे ?६

सातही वारी म्हणावे
होतसे पाठांतर
पालटे मन साथ दे तन
ना प्रभू दे अंतर !७

रचयिता : श्रीराम बाळकृष्ण आठवले