सदैव गीता वाचत जा..

अरे मना तू होउनि अर्जुन सदैव गीता वाचत जा

तुझ्या आतला माधव सांगे सदैव तैसे वागत जा !१ 

कर्तव्याचा निर्णय करते म्हणून गीता वाचावी

आशागीतच आहे गीता म्हणून गीता ऐकावी !२

देह येतसे देह जातसे नश्वर त्याचा मोह नको

दिसे न परि जो असे सुनिश्चित तो आत्मा विस्मरू नको!३ 

ओघे आले कर्म करूनी आवडता हो कृष्णाचा

अभ्यासा उत्साहे लागुनि घे घे अनुभव सोsहंचा!४ 

विकारातुनी विचाराकडे प्रवास ऐसा होऊ दे

अंधारातुनि प्रकाशाकडे प्रवास पथिका होऊ दे!५ 

कृष्ण कृष्ण म्हण येता जाता गीता आचरणी येते

सदा सर्वदा योग हरीचा गीताई साधुनि देते!६

तुझे प्रश्न अन् तुझी उत्तरे खेळ कसा हा गमतीचा 

गीताभ्यासे साधे प्रगती पाठ गिरव संन्नीतीचा!७ 

आठच कडवी या कवितेची गोडीने तू गाशील 

तूच तुझा उद्धार मानवा भवार्णवी या करशील!८

रचयिता : श्रीराम बाळकृष्ण आठवले