सर्व क्षेत्री माझी वसती! अध्याय १३ - क्षेत्रक्षेत्रज्ञ योग

शरीर म्हणजे क्षेत्र अर्जुना आत्मा तो क्षेत्रज्ञ असे
या दोघांचे नाते कैसे जिज्ञासा वदनी विलसे!१

सर्व क्षेत्री माझी वसती दिक्कालांची ना सीमा
जो परमात्मा तोच तोच मी ज्ञान हेच रे अरिंदमा!२

दहा इंद्रिये पाच विषय ते अहंकार मन बुद्धि तशी
क्षेत्र विकारी संक्षेपाने तुला दिली कल्पना अशी!३

विकारविरहित निर्मळ तनमन उपकारक हे ज्ञानाला
साधक असतो सदैव तत्पर नित्यनेम अनुसरण्याला!४

ज्ञान प्रकटते सद्गुणांतुनी आचरणे जन पारखती
विषया विटता ममत्व सरते समत्व देते अनुभूती!५

आनंदाचा कंद अंतरी पालटले मन आत वळे
नमन घडे मग सहजपणे हे ज्याचे त्याला जाणवले!६

वसे शरीरी लेप न काही गुणातीत परमात्म्याला
दोघांमधला भेद कळे तो भ्रमजाली ना गुरफटला!७

क्षेत्र तसे क्षेत्रज्ञ जाणता नश्वरात शाश्वत दिसला
विकारातुनी सुटण्याचाही उपाय सहजच सापडला!८

रचयिता: श्रीराम बाळकृष्ण आठवले