सदा सर्वदा मला स्मरावे! अध्याय ८ - अक्षरब्रह्म योग.

कसे जगावे हे तुज कळले, कसे मरावे जाणुनि घे
सदा सर्वदा मला स्मरावे रहस्य इतके साधुनि घे!१

ज्या भावाचे चिंतन घडते त्या भावाचे कर्म घडे
नाम स्मरता ज्ञान स्फुरते भक्ताचे ना कुठे अडे!२

सदैव स्मर तू मजला पार्था युद्ध करी तू प्राणपणे
मजला अर्पुनि तनमनधन मग तुला न राही कुठे उणे!३

मन हे निश्चल योगाभ्यासे देह पडो मग कुठे कधी
मलाच येउनि मिळे भक्त तो, तो योगी तो खरा सुधी!४

एकाक्षर जे ब्रह्म तयाचा मुखातुनी हो उच्चार
मीच प्रेरणा देत तयाला तो वदतो मग ओंकार!५

धाव मनाची नच बाहेरी इंद्रिये न कसमस करती
प्रसन्न मुद्रा त्या योग्याची आत रहाया ये शांती!६

नित्ययुक्त जो माझ्या ठायी अनन्यचित्ते मज भजतो
त्या योग्याने स्मरता मजला तो माझ्यातच विरघळतो!७

आठवाच मी आठव मजला सदा सर्वदा निरोप हा
दुःखालय तो पुनर्जन्म नच, परमसिद्धिचा मार्गच हा!८

रचयिता: श्रीराम बाळकृष्ण आठवले