कितिकितिदा घोकायाचे शिरडीला मज जायाचे..

कितिकितिदा घोकायाचे
शिरडीला मज जायाचे! ध्रु.

साईमाय माझी
वाट पाहे कधीची
कडकडून भेटायाचे!१

आनंदाने गावे
गावे गावे जीवेभावें
भजन साईरायाचे!२

हाती खंजिरी प्रेमाची
पायी घुंगुरे सोsहंची
भक्तिरंगी रंगायाचे!३

गोदामाईचा तो घाट
भक्तिप्रेमाची ती पेठ
भरभरुनि प्रेम घ्यायाचे!४

माझी ज्ञानाई साई
माझी तुकाई साई
विश्वात्मक मज व्हायाचे!५

वाटे कल्पतरु साई
माझे दत्तगुरु साई
सोsहं ध्यानात रंगायाचे !६

काय वानू नवलाई
कनवाळू साईमाई
फळ रसाळ मज व्हायाचे!७

रचयिता: श्रीराम बाळकृष्ण आठवले
२९.०७.१९७६
कितिकितीदा घोकायाचे
👆🏻 ऑडिओ