गणेशा नाम तुझे गातो!

रात्रंदिन मी अगा गणेशा
स्वरूप तव ध्यातो
गणेशा नाम तुझे गातो!ध्रु.

मंगलमूर्ती तुजला म्हणती
त्रैलोक्यात पसरली कीर्ती
या मातीतुन देह तुझा रे आकारा येतो!१

अकार उदरा मकार मस्तक
उकार पदयुगुलाचा वाचक
ज्ञानेशे ओंकार दाविला अनुभव तो घेतो!२

मूषकावरी स्वारी बसली
निराशा न नावाला उरली
ज्ञानकमळ करि हळू उमलले सोऽहं घमघमतो!३

ब्रह्मरसाचा करात मोदक
तुझे देखणे सकलां रोचक
अभयहस्त तर अगणित विघ्ने विलयाला नेतो!४

तुला वंदुनी कामे करता
आरंभी घे रूप सांगता
संगीताचा शिल्पकलांचा संगम हा घडतो!५

लोकनायका विनायका हे
प्रवर्तका हे सुधारका हे
एकात्मच हे राष्ट्र बनावे इतके तुज प्रार्थितो!६

रचयिता : श्रीराम बाळकृष्ण आठवले