पांडुरंग मी करित प्रतिज्ञा, मातृभूमि मुक्तीसाठी..

शपथ भवानी मातेची, शपथ नग्न समशेरीची
पांडुरंग मी करित प्रतिज्ञा, मातृभूमि मुक्तीसाठी!ध्रु.

निर्दालाया ही परवशता
झिजविन कायाचंदन आता
यावज्जीव झटेन प्रत्यही धावत येइन सेवेसाठी!१

देहाचा या होम करावा
नवा जन्म भारतात घ्यावा
कार्य न अपुरे राहू देइन तळमळ मनि दिव्यत्वाची!२

आवश्यक ती शक्तीबुद्धी
पवित्र कार्यी मंगलसिद्धी
माझ्या श्रीहरी देइ सकल तू आस प्रतिज्ञापूर्तीची!३

रचयिता : श्रीराम बाळकृष्ण आठवले