देहातच पंचमहाभूते..

देहातच पंचमहाभूते

पंचमहाभूतांचा खेळ हा तनी।ध्रु.

मातीची ओढ तना तीत खेळला
रांगलास, घास तिचा तूच घेतला
अंकावर घेई ती अंतिच्या क्षणी!१

जीवन ते जळ झाले, तेच प्राशिले
आत तुझ्या जीवाला शांत वाटले
सुखदुःखी अश्रुरूप जात वाहुनी!२

तेज तुझ्या डोळ्यातच ते जनां दिसे
ते तनात, भाषणात तू पहा कसे
पाहि ईशतेज नित्य नेत्र झाकुनी!३

वायूविण शब्द कुठे? तोच बोलवी
देहाचे यंत्र तुझे श्वास चालवी
त्या पवना तू मनास टाक जोडुनी!४

पोकळी असे तनात ती जरा हवी
तीच तुला विश्रांती नित्य देववी
आकाशा आतल्याच घेई पाहुनी!५

कल्पना: अण्णा (ज.कृ.) देवधर
शब्दांकन: श्रीराम बाळकृष्ण आठवले
(चिंतन चतुर्दशीमधून)

ऑडिओ ऐकण्यासाठी टायटल वर क्लिक करा