आमची यात्रा मुंबईची, उद्यमनगरीची....

पूर्वी शाळेची ट्रीप जायची मुंबईला (बहुतेक जाताना विमान प्रवास असायचा), त्यावर आधारित हे काव्य..

आमची यात्रा मुंबईची
उद्यमनगरीची!ध्रु.

विशाल सागर नाच करी
तयास वारा साथ करी
ऐसी नवलाची!१

चौपाटीवर निसर्ग शोभा
मनामनातुन आनंद आभा
याद दिवाळीची!२

दख्खनराणी कशी धावते
डोंगरातुनी वाट काढते
घाई गर्दीची!३

नभात घेई झेप विमान
आम्हा ठेंगणे हो अस्मान
बालकसेनेची!४

उरका अपुली कामे झटपट
नकोच आळस नकोच वटवट
या संदेशाची!५

रचयिता : श्रीराम बाळकृष्ण आठवले
१७.२.१९८५