विठ्ठल! विठ्ठल! विठ्ठल! विठ्ठल! ध्रु.
टाळ घुळघुळे, मृदंग घुमतो
देहावरती कोण राहतो
इंद्रायणीचे झुळझुळते जळ!१
भाळी बुक्का लागे नकळत
माळ तुळशिची भक्ता राखत
फुलाहूनही वाचा कोमल!२
प्रपंच आपला होतच असतो
परमार्थाचे कोण पाहतो?
ओवी अभंग सेवावे जळ!३
हरिपाठी लाभे विश्रांती
दया क्षमा वसतीला येती
मेरूसम मन होई निश्चल!४
पाषाणाची बरवी मूर्ती
ती वज्राची बनवी छाती
वारकरी हो मनेच निर्मळ!५
पंढरीनाथा कैसे आला
गंध चंदनी कुठून भरला
गंगायमुना नयनीचे जळ!६
पंढरीराणा घरी पाहुणा
पुंडलीकवरदा यदुराणा
उभे पाठिशी बाळकृष्णबळ!७
तोच आपले नाम आठवी
तोच लिहाया आपण बसवी
पांडुरंग हरि निर्बळास बळ!८
रचयिता : श्रीराम बाळकृष्ण आठवले
No comments:
Post a Comment