निसर्ग खुणवे उठा मुलांनो
मौज लुटाया चला! ध्रु.
भल्या पहाटे वायुलहर ती
एक अनामिक देते स्फूर्ती
आळस झटका, शुद्धबुद्ध व्हा
मुक्त मनाने चला!१
विशाल नभ हे, विशाल धरती
मोदसागरा आणत भरती
अरुणोदय हो मनामनातुन
अर्घ्य द्यावया चला!२
जलधारांनी बरसे श्रावण
शरद चांदणे देइ निमंत्रण
परिवर्तन जे नकळत होते
ते निरखाया चला!३
एक रोप तरि लावायाचे
तयास पाणी घालायाचे
फुले कशी रोपास लागती
कौतुक बघण्या चला!४
रचयिता : श्रीराम बाळकृष्ण आठवले
No comments:
Post a Comment