अशी कशी सूनबाई? अशा कशा सासूबाई?

अशी कशी सूनबाई? अशा कशा सासूबाई?ध्रु.

नका संशयाने पाहू नका दुराव्याने पाहू
चला आनंदाने राहू, प्रेम देऊ प्रेम घेऊ
दोष पाहता पाहता, कावीळच जणु होई!१

आहे प्रपंच कुणाचा? अता मुलाचा सुनेचा
पण वारसा कुणाचा? आहे आईवडिलांचा
मुला लाभलेली माया का हो सुनेलाच नाही?२

थोडा सद्भाव जागवा, थोडा विश्वास दाखवा
मध्ये थोडे दिस तरी सून माहेरा पाठवा
ओढ घराचीच तिला घरी घेऊनीच येई!३

अपेक्षेत दडे दुःख निरपेक्षता हे सुख
कौतुकाची मना भूक संशयाने धाकधुक
थोडे सोसावे झिजावे नको शब्द वावगाही!४

सून जैसी लेक आहे, सासू आई तैसी आहे
जो जो जैसा नाते पाहे त्यास तेच नाते आहे
वृत्ती बदलण्या नका लावू उशीर हो बाई!५

रचयिता : श्रीराम बाळकृष्ण आठवले

अशी कशी सूनबाई? अशा कशा सासूबाई?
👆🏻 ऑडिओ