देशगौरव हे सुभाषा, बाळगे मी एक आशा

देशगौरव हे सुभाषा, बाळगे मी एक आशा!ध्रु.

नवयुगाचा वीर तू
उंचवी रे क्रांतिकेतू
शिवनृपा आदर्श मानुनि चालवी तो वारसा!१

वीर सैनिक मेळवी
शस्त्रसंगर चालवी
युद्धचि स्वातंत्र्य देते तोच तो घेई वसा!२

येथ पळ राहू नको
जालि या गुंतू नको
शत्रु हाती दे तुरी तू जा दुरी तू राजसा!३

लोकनिंदा सोशिन
सैन्य तुजसि पुरविन
जाणशी अंतस्थ हेतू जाणशी मज  मी कसा!४

व्यक्तिगत कीर्ती नको
श्रेयवाटा मज नको
जाशि तेथे हो यशस्वी स्वीकरी तू नवदिशा!५

शत्रु अडचण संधि ती
लाभताहे संप्रती
देई रे ऐसा तडाखा युद्धि तू श्रीरामसा!६

हरप्रयत्ने तू अता
मायभूची मुक्तता
साधता होशील तिचिया कंठि कोस्तुभमणि जसा!७

रचयिता : श्रीराम बाळकृष्ण आठवले
(सुभाषचंद्र आणि सावरकर भेटी वर आधारित काव्य)