लक्ष्मी तिजविण कोण असे?

"पैसा" केवळ आहे साधन
कांचन कमला कसे असे?
घरी वावरे, सर्व आवरे
लक्ष्मी तिजविण कोण असे?

असो गरीबी शांतच राही
हाव हावरी शिवतच नाही
कोंड्याचा ती करते मांडा
ध्यानी यावे सांग कसे?

अमंगलाला दूर सारते
"शुभं करोति" भावे म्हणते
ज्ञानाचा नित दिवा लावते
प्रकाश अंतरि येत असे!

ती तव आई, पत्नी, तनुजा
भगिनी अथवा समज पंकजा
लेप कशाचा लागु न देते
कळते तरि का उमज नसे?

भगवंताची करे आरती
स्तवने भजने खुले भारती
प्रसन्न हसते मधुर बोलते
लक्ष्मी तिजविण कोण असे?

दैवी गुण ही संपदाच रे
दुर्गुण सगळे विपत्तीच रे
सुभगा, सुखदा, सुहासिनी रे
चिंतन पूजन खरे असे!

रचयिता : श्रीराम बाळकृष्ण आठवले
२७.१०.१९८९
लक्ष्मी तिजविण कोण असे?
👆🏻 ऑडिओ