अंदमानच्या भिंती....

अंदमानच्या भिंती मिरविति काव्याच्या पंक्ती!ध्रु.

येथिल बंदी नामी संधी
महाकवी तो अचूक साधी
दिव्या प्रतिभा जागृत होता शब्द धाव घेती!१

गाता गाता गीत स्फुरावे
भिंतीवरती 'अक्षर' व्हावे
प्रथम भिंतिवर स्मृतीत नंतर ऐसी ही रीती!२

हातकडीमधि जरि टांगला
कवी समाधीमधी रंगला
सुखदुःखांच्या अतीत होई महाकवि स्थिरमती!३

भिंतच कागद खिळा लेखणी
इच्छाशक्ती प्रबल कविमनी
आत्मा विहरे अनंतांतरी स्वरलहरी उसळती!४

कविता लिहिणे स्वये वाचणे
सुधारणे कंठस्थहि करणे
जगाआगळी अशी चिकाटी पाहुनि थक्कित मती!५

शिक्षेचे तधि होत विस्मरण
पुलकित होई तनुचा कणकण
श्रेष्ठ तपस्या अशी पाहता हरखे सरस्वती!६

रानफुले प्रतिभेची डुलता
चित्त प्रमोदे डोलडोलता
भूतकाल ही स्फूर्ती आणिक धृपद राष्ट्रभक्ती!७

हिंदू जनता हिंदू जीवन
हिंदु संस्कृती हिंदू दर्शन
हिंदुत्वाचे उत्कट चित्रण कवि कुठले करिती?

रचयिता : श्रीराम बाळकृष्ण आठवले