विनायक शिकवी बंदिजना

लेखनवाचन गोडी लावी, रुचि आणी जीवना
विनायक शिकवी बंदिजना!ध्रु.

स्वये वाचणे कथा सांगणे
वाचनगोडी जना लाविणे
कार्यलालसा प्रखर तयाची, उत्सुक अध्यापना!१

ग्रंथ वाचतो, संग्रह करतो
ग्रंथालय चिमुकले काढतो
जिज्ञासा वाढवी जनमनी कर्तृत्वी नच उणा!२

भाबडेपणा हळुहळु जाई
अध्यापनि नच करतो घाई
गुरुमाउली प्रसन्न झाली वाटे सकलांना!३

धर्मांतर राष्ट्रांतर जाणे
उदासीनता घातक माने
शुद्धि संघटन दीप सहाय्यक देती नवचेतना!४

धर्म न वसतो अन्नामाजी
धर्म न वसतो रूढींमाजी
हिंदुत्वाते सुबोध करण्या शिकवितसे प्रार्थना!५

प्रचारकार्या गती लाभली
मोदफुलेही हळू उमलली
सूर सापडे सहज गायका रंग भरे गायना!६

शिक्षा इकडे भोगत असता
मानस कोठे गुंतु न देता
कर्मवीर हा रंगे कर्मी विसरुनिया बंधना!७

रचयिता : श्रीराम बाळकृष्ण आठवले