माउली माहेरा चालली..

अनामिक ओढ उरी दाटली
माउली माहेरा चालली!धृ.

गीताजीवन जगता आले
कारुण्यी दडवुनी पाउले
प्रसन्न शांती मनसा भोगत
पुढे पुढे चालली!१

पैलतीराला नेत्र लागले
श्रीविठ्ठल सामोरे आले
अनंतास आसक्ती लावत
हलकेसे हासली!२

जगात असुनी जगावेगळी
वैराग्याची धुनी पेटली
निवृत्तीही ढळू लागला
मुक्ता बावरली!३

शब्दाला जणु अर्थ सोडतो
लावण्याचा प्रकाश जातो
ऐन दुपारी लोपे दिनकर
सृष्टी अंधारली!४

रचयिता : श्रीराम बाळकृष्ण आठवले
२६.२.१९८३