भावार्थाची उजळ दीपिका!

भावार्थाची उजळ दीपिका अगा ज्ञानदेवा
ओवी ओवी शिकव राजसा सर्वात्मक देवा!ध्रु.

भगवन् विष्णो हे ज्ञानेशा कर अमुचे जुळले
गीतार्थाच्या श्रवणालागी श्रोते आतुरले
प्रभातकाली किरण एक तरी अंतरात यावा!१

मातृत्वाचा मंगल महिमा सद्गुरुची स्तवने
ऋग्वेदाच्या ऋचा कवीशा गा गा उच्च स्वने
माधुर्या माधुर्य आणण्या प्रसाद तू द्यावा!२

थोर विरागी तत्त्वज्ञानी योगी योग्यांचा
शैशव गमशी मानवतेचे मौनावे वाचा
वदनी सुस्मित हे मौनांकित ऐक ऐक धावा!३

रचयिता : श्रीराम बाळकृष्ण आठवले
१०.५.१९८४