हताश होणे शोभत नाही भगवंताच्या भक्ताला..

हताश होणे शोभत नाही भगवंताच्या भक्ताला
घरी न बसता चालत राहे जनार्दना भेटायाला!ध्रु.

चिंतन करता, चालत असता
दुःखामधले सुख कळते
वियोगातही आप्तांच्या त्या
हरियोगाचे फळ मिळते
जे घडते ते अंति हिताचे खूण पटे ज्याची त्याला!१

स्वरूपात जो निवास करतो
तोच असे हो आनंद
जे न बघे जग तेच दिसे त्या
स्थलकालाचे ना बंध
सद्गुरुशी संवाद साधण्या हा सरसावे ध्यानाला!२

खचू न द्यावे मना कधीही
कळ सोसावी मुद्दाम
निष्ठा लागे कसास अपुली
स्वामी पाठीशी ठाम
घाव टाकिचे सोसे तेव्हा मूर्ती ये आकाराला!३

हानिलाभ ही समान दोन्ही
खेद हर्ष मानणे नको
जन्ममृत्यु स्वाभाविक दोन्ही
हसणे रडणे नको नको
विकारवश ना तोच विवेकी हवाहवासा विश्वाला!४

रचयिता: श्रीराम बाळकृष्ण आठवले
२०.०१.२००२

हताश होणे शोभत नाही..
👆🏻 ऑडिओ