मोडुनीया लेखण्या...

मोडुनीया लेखण्या हाती घ्या हो संगिनी!ध्रु.

ओळखा युगधर्म हा
शस्त्रमहिमा थोर हा
सैनिकी सामर्थ्य येते राष्ट्रजीवनरक्षणी!१

दूर ठेवा शारदा
ती निवारा आपदा
शरण जा दुर्गेस आता शस्त्रविद्याशिक्षणी!२

शस्त्र रक्षी राष्ट्र ते
शस्त्र उजळी शौर्य ते
लेखण्या मोडाच आता संगरी जा धावुनी!३

शस्त्रबळ आता हवे
क्षात्रबळ अंगी हवे
पौरुषाते प्राप्त करण्या उंचवा त्या संगिनी!४

युद्धविद्या आजला
श्रेष्ठतम आहे कला
सैनिकी शाळा हव्या हेच सांगे भाषणी!५

पाशवी सामर्थ्य ते
संस्कृतीसी जाळते
शस्त्रविद्या मेळवा संस्कृतीच्या रक्षणी!६

चापधारी राम तो
चक्रधारी कृष्ण तो
देव सारे शस्त्रधारी मर्म घ्या हे जाणुनी!७

रचयिता : श्रीराम बाळकृष्ण आठवले