अभंग ज्ञानेश्वरी....

अभंग ज्ञानेश्वरी वाचणे अनुभव हा आगळा
अलंकापुरी पावस यांचा संगम हा साधला!ध्रु.

सहज बसावे हाती घेउन हा दैवी ग्रंथ
ओळीमागुन ओळी वाचत जावे हो संथ
अश्रू झरती भाव अनावर कंठ कसा दाटला!१

निकट आपुल्या 'स्वामी' बसले प्रेमळ सहवास
प्रत्यक्षाला कसे म्हणावे हा तर आभास
अभ्यासाची लागे गोडी नम्र साधकाला!२

अंतर्यामी घेत राहावे शोध स्वरूपाचा
या यत्नातच आहे दडला स्रोत आनंदाचा
घराघरातुन अखंड चालो पारायण सोहळा!३

मज हृदयी सद्गुरु माउली ज्ञानाई बोले
पटते याची साक्ष भाविका तोही मग डोले
श्रीकृष्णाची मुरली वाटे ग्रंथराज सकला!४

तपाचरण हे अभ्यासावी अभंग ज्ञानेश्वरी
पुन्हा पुन्हा वाचता चरण हे उचंबळत लहरी
या प्रेमाच्या गावा जावे ध्यास लागलेला!५

रचयिता : श्रीराम बाळकृष्ण आठवले
१७.६.१९८९