वंदे मातरम्

भारतमाता अमुची आई
कोटि वंदने तिला!
देह हा तिच्या पदी वाहिला!ध्रु.

सत्याचा तर सूर्य तळपतो
अमृतधारा चंद्र वर्षतो
हासते कशी सस्यश्यामला!१

जातिभेद, मतभेद विसरणे
शीलधनाला सदैव जपणे
श्रमांनी ही सुजला-सुफला!२

जीवन हो प्रेमाने सुंदर
निर्धारे हो सोपे खडतर
भिजवू घर्मजलाने हिला!३

सद्भावच हा देव आतला
उपासनेचा सदा भुकेला
साधु या आत्मविकासाला!४

रचयिता: श्रीराम बाळकृष्ण आठवले
२३.६.१९८४