गोसावी सजला! मोरया गोसावी सजला

अंगि शोभली भगवी कफनी
कंठी रुद्राक्षांची माळा
कमंडलू घेताक्षणि हाती
गोसावी सजला! मोरया गोसावी सजला! ध्रु.

दीक्षादाता श्रीगजानन
कानी केले मंत्रोच्चारण
प्रेमभराने पद्महस्त तो अंगावर फिरला!१

ग्रामी फिरती, मंदिरि जाती
तेज आगळे वदनावरती
जीवदान अन् दीक्षादानहि एकचि समयाला!२

मयुरेश्वर  प्रकटे त्याकाली
मातापितरे कृतार्थ झाली
प्रेमाश्रूंनी चिंब भिजविले निजसर्वस्वाला!३

गंडांतर हे कैसे टळले?
प्रभुलीला कोणास आकळे?
भट्ट न पदवी, गोसावी पद रुचे मोरयाला!४

रचयिता : श्रीराम बाळकृष्ण आठवले
पूरिया, त्रिताल