नाते पतिपत्नींचे

नर नारी या पलिकडचे
ते नाते पतिपत्नींचे!ध्रु.

दोन देह परि एकच आत्मा
देहांच्या लंघुनिया सीमा
मने मनाला जोडत जुळवत
फुलता फुलवायाचे!१

ते सोशिकपण डोळस ममता
गुणग्रहण चित्ताची समता
दोष न बघता सावरताना
दर्शन शिवशक्तींचे!२

उपभोगाची नुरे लालसा
राम अंतरी असा भरवसा
या संसारा भजन समजुनी
गाता रंगायाचे!३

वेलीवरती फुले उमलती
आपण हसती जनां सुखवती
सद्गुण सौरभ दूर दरवळो
स्वप्न सत्य करायाचे!४

विश्वासावर समर्पणावर
आस्वादावर, त्या त्यागावर
संतोषाचे निशाण सुंदर
फडकत ठेवायाचे!५

रचयिता: श्रीराम बाळकृष्ण आठवले
(राग मांड)
३०.९.१९९४