तुमचे गाऊ किती गुण, योगिराज!

तुमचे गाऊ किती गुण, योगिराज!ध्रु.

संतसमागम सहज साधता
राग भक्तिचा नित आळविता
पवित्र जीवन सद्गुरु अपुले -
गाऊ देत स्वरराज!१

शुद्धाहारी, परोपकारी
विकारारि भाविककैवारी-
अभय द्यावया कर उंचावे
तेच उरे त्या काज!२

चिरंजीवपण तुम्हा लाभले
वदनी विलसे तेज आगळे
अभ्यासासह विनयशीलता-
हास्याचाही साज!३

दत्तोपासक तुम्ही योगिजन
मनोमनी करता गुरुसेवन
योगपंथि चालता निश्चये-
नाम मिळे पंथराज!४

ज्ञाना आपण अन्न मानिले
गुरुसाहित्या पुढे आणिले
घास भरविले इवले इवले-
कृतज्ञता शिर लववित आज!५

देहभोग जे - हसत भोगता
तटस्थ वृत्ती मुळि न सोडता
ओंकाराचे तेज मुखावर
झळकत जणु रविराज!६

रचयिता : श्रीराम बाळकृष्ण आठवले
मालकंस त्रिताल
भैरवी