जो सावध तो शिकला..

प्रतिपळ सावध रहायचे, मज शिकायचे
मज शिकायचे!ध्रु.

वृक्ष वाकती फलभाराने मेघही झुकती जलभाराने
विनम्र तैसे बनायचे!१

टाकीचे ते घाव सोसणे, दगडातुन मूर्तीच प्रकटणे
प्रहार हासत साहायचे!२

क्षमा शिकावी भूमातेची, विशालता ती आकाशाची
दान करांनी करायचे!३

पाणी घाली फळे तयाला, दगड मारतो फळे तयाला
समदर्शी मज बनायचे!४

शिक्षणास या सीमा नाही, श्वास तोवरी शाळा राही
जीवनभर मज शिकायचे!५

रचयिता : श्रीराम बाळकृष्ण आठवले
मे २००१