'वीर विनायक सावरकर' - एक नाममंत्र

'वीर विनायक सावरकर' हा नाममंत्र गावा
अखंड भारत, अभिनव भारत आकारा यावा!ध्रु.

खंडित भूमी अखंड होते अमुचा विश्वास
चला करू या निर्धाराने पुन्हा प्रयत्नास
युवक नि युवती सिंहयुग्म तर कुमार हो छावा!१

अष्टभुजा देवीचे पूजन पुरवितसे शक्ती
योगाभ्यासे आवरते मन जाणतसे युक्ती
चातुर्ये बुद्धीच्या जाणू आधीच रिपुकावा!२

राष्ट्रभक्त तो हिंदु असतो भिनले हिंदुत्व
गीताईची गुटी प्राशुनी पचले सत्तत्त्व
राष्ट्रासाठी भातुकलीचा खेळहि उधळावा!३

अम्हां भयाचे  नाव न ठावे महारुद्र होऊ
युद्धासाठी, विजयासाठी स्फुरताती बाहू
सिंधुलोकमातेने स्नाने जन्म धन्य व्हावा!४

नामाचे सामर्थ्य जाणण्या पुनःपुन्हा बोलू
तीक्ष्ण बुद्धिच्या निकषावरती घासूनच घेऊ
मी न देह मी अवध्य आत्मा प्रबोध बाणावा!५

रचयिता : श्रीराम बाळकृष्ण आठवले
२०.५.२००१