प्रपंच - परमार्थाची पाठशाळा

प्रपंचात तुज गिरवायाचे परमार्थाचे धडे!ध्रु.

प्रपंच आहे विशाल शाळा
शिक्षक इथला कुणा न दिसला
पाउल इथले मोजत मापत टाकायाचे पुढे!१

आधी परीक्षा निकाल आधी
कुणा समाधी कुणास व्याधी
रस्त्यामधले दे दे फेकुन देहबुद्धिचे खडे!२

चित्ताची जर साधे समता
तनी वज्रता मनी शांतता
सेवा म्हणुनी कर्मे घडता गाठ प्रभूची पडे!३

भलेबुरे ते आतुन कळते
तुला विठाई नित सावरते
कौल मानता मनुजा त्या काय कुठे साकडे?४

मी माझे जर पूर्ण वगळले
गंगोदक जणु जीवन झाले
जिवाशिवांचे मंगलमीलन गुरुकृपेने घडे!५

रचयिता : श्रीराम बाळकृष्ण आठवले