कर्म ते होते परिपूर्ण!

कर्म घडतसे हातुनि जितुके करिता ब्रह्मार्पण 
कर्म ते होते परिपूर्ण! ध्रु.

सागरातुनी वाफ निघतसे 
त्या वाफेतुनि मेघ बनतसे 
मेघांच्या जलधारा मिळती सागरास येऊन!१ 

सिद्धि- असिध्दी चिंता कसली? 
कर्मफुले देवास वाहिली -
नर पामर आज्ञांकित प्रभुचा कर्ता नारायण! २

"मी, माझे" हे मुख्य अडथळे 
दूर सारता झरा खळाळे 
शुद्ध प्रेमळ कर्मे देवा तोषविणे आपण!३ 

रचयिता : श्रीराम बाळकृष्ण आठवले
०९.०१.१९७४

(देखे जेतुलाले कर्म निपजे 
तेतुले आदिपुरुषी अर्पिजे 
तरी परिपूर्ण सहजे जहाले जाण
या ज्ञानेश्वरीतील ओवीवर आधारित काव्य)

ज्ञानेश्वरी ज्ञानकिरणे या स्वामी माधवनाथांच्या विवरणावर आधारित