सिद्धिविनायक मोदी गणपति प्रसिध्द देवस्थान

सिद्धिविनायक मोदी गणपति 
प्रसिध्द देवस्थान
जेव्हा जेव्हा घडते दर्शन 
हारपते हो भान!ध्रु.

मागायाला काही यावे
मागायाचे विसरून जावे
ब्रह्मानंदच मोदक मिळतो
ज्याला ना उपमान!१

अथर्वशीर्षाचे आवर्तन
मांगल्याला ते आमंत्रण
विघ्नांचे विघ्नत्व संपते
गाती भाविक गान!२

तेज तनावर, मूर्ति मनोहर
भाव जागवी मनी शुभंकर
ॐकाराच्या आकारात
रहस्य गवसे छान!३

चारी पुरुषार्थांची प्राप्ती
करून देई मंगलमूर्ती
संघटनेचा पाठ गिरवता
भारत हो बलवान!४

रचयिता : श्रीराम बाळकृष्ण आठवले
२४.०२.१९८९
(पुण्यात मोदी गणपति हे एक प्रसिद्ध देवस्थान आहे. येथिल श्री गणेशांवर  आधारित हे काव्य)