परमार्थाची आस्था ज्यांसी अगणित जन असती परि एखादा साधक विरळा मोक्षासी गाठी!

परमार्थाची आस्था ज्यांसी अगणित जन असती
परि एखादा साधक विरळा मोक्षासी गाठी!ध्रु.

केवळ आस्था भक्ति नव्हे!
केवळ उर्मी शक्ति नव्हे!
चंचल मानस सातत्याने ध्यान कुठे करती?१

सुखदुःखांच्या झंजावाती
पामर सगळे गडबडताती
नाचविते लहरीवर लोकां अधोगामी वृत्ती!२

श्रद्धेचा हृदि लेश नसे
अभ्यासाते कोण बसे?
आत्मचिंतनी होणे कैसी ऐशांची प्रगती?३

रचयिता : श्रीराम बाळकृष्ण आठवले
२२.०२.१९७४

(तैसे आस्थेच्या महापुरी
रिघताती कोटिवरी
परी प्राप्तीच्या पैलतीरी
विपाइला रिगे

या ज्ञानेश्वरीतील ओवीवर आणि स्वामी माधवनाथांच्या ज्ञानेश्वरी ज्ञानकिरणे या पुस्तकातील प्रवचन ६१ वर आधारित काव्य.)