पसायदान करावे..

विश्वात्मक देवाने येणे वाग्यज्ञे तोषावे
तोषुनिया अंतरी तयाने पसायदान  करावे!ध्रु.

हे लेखन ही त्याची सेवा
सुमधुर सुखदा वाटो देवा
सर्वात्मक भगवंते, माझे अंतरंग उजळावे!१

दुर्जन मनिंची नुरो वक्रता
प्रेम स्वकर्मी वाढो आता
हासत खेळत आनंदाने जगी नांदता यावे!२

कुणी नसावे दुःखी जगती
सुख लाभावे सकलां जगती
जो जे वांछिल ते ते त्याला सहजपणे लाभावे!३

रचयिता : श्रीराम बाळकृष्ण आठवले
२३.१२.१९७४

(आता विश्वात्मके देवे
येणे वाग्यज्ञे तोषावे
तोषोनि मज द्यावे
पसायदान हे

जे खळांची व्यंकटी सांडो
तयां सत्कर्मी रति वाढो
भूतां परस्परे पडो
मैत्र जीवाचेे

या ज्ञानेश्वरीतील ओव्यांवर आणि स्वामी माधवनाथांच्या ज्ञानेश्वरी ज्ञानकिरणे या पुस्तकातील प्रवचन २०४ वर आधारित काव्य).