बैसतो साधक एकांती!

घराजवळि त्या श्रीविश्वेश्वर
तिथे नांदतो स्वयंभू शंकर
एकलेच गाठूनिया मंदिर
भोगत विश्रांती -
बैसतो साधक एकांती!१

मिटुनी घेई दोन्ही लोचन
प्रतिपळ स्मरतो पापविमोचन
मनी हासतो श्रीशशिभूषण
भावफुले फुलती
बैसतो साधक एकांती!२

चित्ती एकाग्रता प्रवेशे
भक्ति शोभली सुंदर वेषे
आत्माराम हृदीचा तोषे  
भावनोर्मि उसळती-
बैसतो साधक एकांती!३

कीर्तनि प्रवचनि भजनि ऐकले
ते सगळे या चित्ती रुजले
वरती आले कोंभ कोवळे
प्रसन्न डुलताती
बैसतो साधक एकांती!४

बालमूर्ति रिझविते मन्मना
परमात्म्याची कोमल करुणा
अद्‌भुत भक्ती तशी धारणा
शब्दहि पांगुळती-
बैसतो साधक एकांती!५

बालभक्त हा सदाशिवाचा
सोऽहं ध्यानी रमावयाचा
सुधामाधुरी वरिते वाचा
गुरुलीला रंगती-
बैसतो साधक एकांती!६

रचयिता : श्रीराम बाळकृष्ण आठवले
स्वामी स्वरूपानंदांच्या जीवनावर आधारित काव्यातील एक कविता..