या देहाची दशा कशीही असो तियेचे काय तुला?
अलिप्त राही कमलपत्रसम हसत राहा ईश्वरी मुला!ध्रु.
हरिची ओळख नकोस विसरू जाण तयाची नामाने
नामरसायन ऐसे नामी मना घेत जा नेमाने
जन्म ईश्वरी मरण ईश्वरी आजारही तो देहाला!१
दुखण्याचे उपकार खरोखर विचार करण्या लावतसे
पथ्य पाळणे परमहिताचे औषधास पर्याय नसे
कडूपणातहि असे मधुरपण कळले असते काय तुला?२
पुरे हिंडणे मजा मारणे उधळपट्टीही पुरे पुरे
आनंदाचा वास अंतरी आत श्रीहरी पहा बरे
शब्देविण संवाद साधतो सद्गुरुंनी शिकवली कला!३
जोडी जमली विलग व्हावया शेवट आधी जाणावा
चुका जाहल्या त्या टाळाव्या दक्षपणा तो बाणावा
स्वभाव येतो सुधारायला सुधारेन मी म्हणे भला!४
चालायाचे सांजसकाळी मुक्तपणे हसुनी घ्यावे
कुशल विचारत स्नेह वाढवत सखेसोबती जोडावे
अर्थ भरावा निरर्थकीही जुंपुन घे सत्कार्याला ! ५
रचयिता : श्रीराम बाळकृष्ण आठवले
२३.०६.२००१
No comments:
Post a Comment