तुला शोधणे पुढची वाट

तुला शोधणे पुढची वाट 

खेळ चाललासे द्वंद्वाचा 

अवघड आहे जीवनघाट

नकोस जाऊ तरी बावरुन 

तुला शोधणे पुढची वाट । ध्रु 

चढ जर आता उतरण पुढती 

दुःख जर आता सौख्यच पुढती 

सामर्थ्याने अंतर काट । १

भले बुरे ते दोन्ही कळते 

आतुन कोणी तुला शिकवते 

काळोखातुन फुटे पहाट । २

असो अमिरी असो फकीरी 

सदा रहावे निरहंकारी 

सद्भावाचा मिरवी थाट । ३ 

तू सगळ्यांशी वाग सारखा 

गंगेच्या त्या जळासारखा 

समाधान ये घेऊन ताट । ४ 

जैसे द्यावे तैसे घ्यावे 

का कोणाचे मन दुखवावे 

सावध राही व्यवहारात । ५ 

देहामधला देव पहावा 

क्षणात संपे तरी दुरावा 

यशोबीज ते विश्वासात ।६

दोन पावले एक चालणे 

दोन डोळुले एक पाहणे 

घे जीवा सगळ्यांची साथ । ७ 

द्वंद्व भासते तरी ते नसते 

ऐक्य चिंतनी हळू उमलते 

सार तेवढे घे ध्यानात । ८

कल्पना : ज.  कृ.  देवधर (गिझरवाले )

काव्यरुप  -  श्रीराम बाळकृष्ण आठवले