गणेशा द्यावे आशीषा..

प्रणाम सादर स्वीकारावा आपण जगदीशा
गणेशा द्यावे आशीषा!ध्रु.

भोगवाद संपूर्ण सरावा
उपासनेचा मार्ग दिसावा
चित्ते अमुची विशुद्ध व्हावी द्या द्या उपदेशा!१

विकार शमता विचार स्फुरतो
ओंकाराचा ध्वनि प्रस्फुरतो
विद्यानिधि ही द्या अनुभूती जागृत जिज्ञासा!२

शुभचरणांचे व्हावे दर्शन
साहि रिपूंचे व्हावे खंदन
द्यावी श्रद्धा ज्ञानावरती अविचल परमेशा!३

रचयिता : श्रीराम बाळकृष्ण आठवले
(श्रीगणेशदर्शन)