हिन्दुहृदयसम्राट तुझा जय..

हिन्दुहृदयसम्राट तुझा जय!ध्रु.

आम्ही गातो तव जयगाथा
गाता होतो उन्नत माथा
तुझे यज्ञमय अवघे जीवन
मातृस्तनिचे संजीवक पय!१

हे योगीश्वर हे सत्कविवर
हे प्रलयंकर विक्रमसागर
गौरवगीता सुस्वरि गाता
तना मनांची साधू दे लय!२

महाकाव्य जणु अवघे जीवन
मुर्दाडांसी ते संजीवन
श्रद्धेने ते सेवन करिता
दौडदौडती प्रतिभेचे हय!३

अर्थवाहि तव नाव विनायक
तू जननायक तू गणनायक
आदरांजली तुला वाहता
विरघळविते मन एक एक सय!४

सागर जिंकुनि तीर गाठला
जन्माचा इतिहास बनविला
स्वतंत्र भारत, अखंड भारत
बघण्या जगणे हा तव निश्चय!५

तुवा पूजिली शस्त्रधारिणी
वज्रासम तव कणखर वाणी
शस्त्र शब्द अन् शब्द शस्त्र हे
समीकरण वाढविते विस्मय!६

रचयिता : श्रीराम बाळकृष्ण आठवले
मे १९७३