सत्त्व रज तम। ऐसे तीन गुण
मूर्ती ही त्रिमुखी। श्रीदत्ताची! १
मुखे तीन परि। देह तो एकच
एकाच देहात। आले सारे!२
देहास चालवी। अदृश्य जी शक्ती
तिचीच जाणीव। असो द्यावी!३
उत्पत्ती नि स्थिती। विलयही तैसा
विश्वाची धारणा। तिघांमुळे!४
हृदयमंदिरी। आले गुरुदत्त
नित्याचे दर्शन । भाविकाला!५
अविद्या घालवी। स्वरूपाचे भान
ज्या त्या साधकाला। अभ्यासाने!६
अभ्यासा बैसवी। सद्गुरु श्रीनाथ
म्हणून प्रत्यही। गुरुवार!७
अत्रि पिता थोर। आई अनसूया
दाम्पत्याच्या घरी। प्रकटले!८
सदैव हा मुक्त। सदैव निश्चिन्त
सदैव श्रीदत्त। हिंडतसे!९
द्वंद्व न बाधते। श्रीमान हा योगी
प्रशांत विरागी। गुरुनाथ!१०
तीन मुखे त्याला। तैसे सहा हात
विविध त्या वस्तु। बाळगल्या!११
करी जपमाळ। तशीच ती पोथी
कमंडलू शोभे। एका हाती!१२
डमरू तो हाती। त्रिशूळ ही करी
एका हाती गदा। चातुर्याची!१३
चारी वेद तैसे। होऊनिया श्वान
अवतीभोवती। विराजती!१४
सतत भ्रमण। खूण ही गुरूची
आर्तांची ती दुःखे। निवारिती!१५
ओंकाराचा जप। चिंतांना पिटाळी
वाजतसे टाळी। आनंदाची!१६
गाणगापूर, वाडी। तैसे औदुंबर
स्थाने तीन सारी। आवडीची!१७
विभूती चर्चावी। गळ्यात ती माळ
शांतवाया जीवा। बाळगावी!१८
पादुका मस्तकी। आदरे धराव्या
आनंदाचे अश्रू। झरू द्यावे!१९
स्नान तना मना। घालतसे कृष्णा
अपार करुणा। सद्गुरूंची!२०
सद्गुरुकृपेने। श्रीरामा ये जाग
श्रीदत्ते प्रसाद। दिधलासे!२१
रचयिता : श्रीराम बाळकृष्ण आठवले
३१.०१.१९९१
