दुःख दडवावे, सुख दाखवावे..

दुःख दडवावे, सुख दाखवावे
"देहदुःख हेच सुख" सुखे समजावे!ध्रु.

माझे दुःख, माझे सुख विचार हा कोता
सुखदुःख विश्वाचे हा भाव असे मोठा
'घडे ते ते कल्याणाचे' सूत्र उमजावे!१

नसे अंत वेदनांना - नये देऊ लक्ष
नाम घेई राम त्याचा राम घेई पक्ष
आत्माराम आत राहे तिथे लक्ष द्यावे!२

सांजवेळ वाटे जेव्हा जोड दोन्ही हात
मिटोनिया डोळे राजा राहणे निवांत
समाधान ज्याचे त्याने पदरात घ्यावे!३

जन्ममरण त्याच्या हाती शिरी भार फोल
देहभाव सरला त्याचा सावरला तोल
ज्ञानोबाच्या, तुकोबाच्या संगती राहावे!४

रचयिता : श्रीराम बाळकृष्ण आठवले
१३.१२.२००३