'आरोग्याचे नियम पाळणे' औषध याचे नाव जाता येता घे घे मनुजा देवाजीचे नाव!

'आरोग्याचे नियम पाळणे' औषध याचे नाव

जाता येता घे घे मनुजा देवाजीचे नाव!ध्रु. 

खरमरीत जर भूक लागली तरीच जेवावे

वेळ जाहली म्हणून अन्ना आत न लोटावे

पोट ठेवता हलके येती भरून सारे घाव!१

स्वच्छच पाणी ते तर आहे पावन गंगेचे

स्वस्त तसे ते मस्तच रुचकर देणे देवाचे

उठल्यासरशी पिऊन पाणी स्नानासाठी धाव!२

आजाराला आरोग्याला आपण बोलावतो

जरा घसरलो तरीहि तोंडावर आपटतो

आहाराच्या आहारी जाता बुडते पुरती नाव!३

एकसारखे लोळत पडणे आळस वाढवणे

चालणे न मुळी कष्ट टाळणे शरीर गंजत जाणे

नियमित व्यायामाने मनुजा शक्ति पणाला लाव !४

औषध ज्याला लागले न कधि वीरगडी तोच

सदा हसतमुख देवाचाही आवडता तोच

अजून आहे सुधारणेला तुजला मोठा वाव!५

रचयिता : श्रीराम बाळकृष्ण आठवले

प्रभात झाली मनी जागा हो ज्ञानबा – तुकाराम

भूपाळी

प्रभात झाली मनी जागा हो

ज्ञानबा – तुकाराम ! ध्रु.

आळंदी मज बोल बोलवी

देहु मोदे डोल डोलवी

अनुभव अभिराम ॥ १ ॥

भावभक्तिची नदी झुळझुळे

नयनी प्रेमाश्रुही झरले

गंधित मम धाम ॥ २ ॥

सुमधुर वीणा कोण छेडते

किणकिण झांजेचीही येते

अनावरच नाम ॥ ३ ॥

ओवी अभंग एका वेळी

तशी विराणी कानी आली

समाधि विश्राम ॥ ४ ॥

दुरितांचे हे तिमिर जाउ दे

विसर न आपुला कधी पडु दे

विनवी श्रीराम ॥ ५ ॥

रचयिता : श्रीराम बाळकृष्ण आठवले

देहात आपुल्या मनुजा मजला पाही....

मी कधी कुठे भेटेन प्रश्न मुळी नाही

देहात आपुल्या मनुजा मजला पाही ! ध्रु. 

तू वाचत जाई गीता ते चरित्र माझे भक्ता

कर्तव्य आदरे घडता का करावयाची चिंता?

हे जीवन आहे वीरा दीर्घ लढाई !१

अवतरलो कारागारी मी प्रकाश घन अंधारी

बंधनेच तुटली सारी, यमुनाही दोघा तारी

जननीस मुके परि ध्येय विसरलो नाही!२

मृत्यूचे भय मम मामा, त्या धाडियले निजधामा

देहाहुन भिन्नच आत्मा, अंशरूप तो परमात्मा 

खेळलो शिशुपणी वृत्ती खिलाडू राही !३

तू वासुदेव हरि गा रे सुखवती सुगंधी वारे

झणि गोकुळात तू जा रे सौंगडी भेटती सारे

जाती न, पाडली खाती ध्यानी घेई !४

कार्यात चिकाटी श्रद्धा तर हरेक होई योद्धा

स्वातंत्र्य लाभते बद्धा सिद्धीची आस न सिद्धा

प्रतिकूल सर्व जे वीरा अनुकुल राही !५

घ्या सहकार्याच्या टिपऱ्या सुटल्याच अडचणी साऱ्या 

विघ्नांचा पुरता बोऱ्या भिडताच सदा सत्कार्या

तो अशक्य शब्दच माझ्या लेखी नाही !६

रघुकुलातला जो राम यदुकुलात तो मी श्याम

देहाचे करूनी धाम आत्मा घे क्षण विश्राम

देहोsहं भ्रांती स्वप्नातहि ना काही !७

तू स्मरशी तेव्हा तेथे ध्यानातच तुजला भेटे

अंतर ते सगळे सरते रोमांचित काया होते

गोपाष्टमी अथवा कालाष्टमी ती होई !८

ज्ञानेश्वर आळंदीचा तो एकनाथ पैठणचा 

नामदेव पंढरपुरचा तुकयाही त्या देहूचा

साहित्य तयांचे देही करत विदेही !९

दोषांना दुर्लक्षावे गुण तेवढेच उचलावे 

का कोणाला निंदावे? वैर ना विकत ते घ्यावे

रे अनेकातला एकोपा मी तो ही !१०

मी माझे सहज गळू दे, तो कर्ता उमज पडू दे

हा काळ सुखे बदलू दे मन खंबीरच राहू दे

प्रतिभा श्रीरामा शब्द शब्द सुचवे ही !११

रचयिता : श्रीराम बाळकृष्ण आठवले

आरती ज्ञानबा तुकारामा....

आरती ज्ञानबा तुकारामा!

आलो शरण तुम्हा, द्या मज प्रेमा

ज्ञानबा तुकारामा ! ध्रु. 

इंद्रायणीच्या काठी 

दोघांची वस्ती

मनी भरून वाहे भीमा !१

माझे ज्ञानाई आई 

तुकाई आई

नसे अगाध प्रेमा सीमा !२

ओवी सप्रेम गाऊ

अभंग गाऊ

लावा अज्ञान जीवा नामा !३

बुक्का कपाळी लागे

विठ्ठल जागे

वैकुंठ आणता धामा !४

देता नामाची जोड

संसार गोड

रामा न वानवे महिमा !५ 

रचयिता : श्रीराम बाळकृष्ण आठवले

दिंडी चालली चालली पंढरीला....

दिंडी चालली चालली पंढरीला 

ज्ञानबा तुकाराम ! ज्ञानबा तुकाराम ! ध्रु. 

असो उन वा पाऊस वारा 

पांडुरंग करि पाहुणचारा 

भक्ति सुखाचे धाम ! १ 

अभंग गाता हरिपाठाचे 

विठ्ठल आपुल्या मनात नाचे 

दासाचा श्रीराम ! २ 

देहु आळंदीची गोडी 

वर्णाया भाषाच तोकडी 

भाविक घेई नाम ! ३ 

गीता मुरली श्रीकृष्णाची 

ज्ञानदीपिका ज्ञानेशाची 

देत मना विश्राम ! ४ 

परस्परांच्या पाया पडती 

उरा उरी जन असे भेटती 

विना दाम हो काम ! ५ 

रचयिता : श्रीराम बाळकृष्ण आठवले