भारतीय मी इथे जन्मलो माती ही मोठी माता
इथे खेळलो, पूर्ण उमललो, विसावेन जीवन सरता!
राम कृष्ण आदर्शच माझे रामायण बहु प्रिय मजला
भगवद्गीता मजला गमते अमृतघट हा भरलेला
निर्भय, निस्पृह बहुश्रुत मला स्वावलंबने व्हायाचे
नर नारायण होत प्रयत्ने विघ्नांशी झुंजायाचे
जिज्ञासा जागती ठेवता हुरूप वाढे शिकताना
प्रश्न आपुले उत्तर अपुले अविरत चिंतन घडताना
इतिहासा जो विसरून जातो देशनिवासी तो कसला
अपमानाची चीड न ज्याला सैनिक देशाचा कसला
आक्रमणाची खंत वाटु दे विभाजनाचे शल्य सलो
अखंड भारत अजिंक्य भारत मना मनातुन स्वप्न फुलो
रहस्य गायत्री मंत्राचे अभ्यासे जाणुन घेई
सूर्यासम तेजस्वी होउन मने मने जिंकुन घेई
अथर्वशीर्षाच्या अभ्यासे वक्तृत्वाचा फुले मळा
सामवेद तो शिकता शिकता अंगी मुरते गान कला
संध्या वंदन अर्घ्य समर्पण इंद्रिय संयम नित घडता
नित्य नवा दिन उत्साहाचा जीवनसाथी तो सविता
विनायकाचे मज आकर्षण गणनायक मज व्हायाचे
चातुर्याने पराक्रमाने अरिमर्दन रणि करायचे
रचयिता - श्रीराम बाळकृष्ण आठवले
