खेळा, भरपूर खेळा.....

खेळा, भरपूर खेळा!ध्रु.

वेगे धावा, उड्याहि मारा
परिसर जागो सारा
जनात आनंदे मिसळा!१

कधी विजय तर कधी पराभव
दोन्हीचा चाखावा अनुभव
मीपण पूर्ण पिटाळा!२

आनंदाने जगता येते
मैदानावर ध्यानी येते
आरोग्या सांभाळा!३

रचयिता : श्रीराम बाळकृष्ण आठवले

ग. श्री. खैरं नमाम्यहम्....

सदाचार प्रसारार्थं
गीतारत्नं  परीक्षितम्
द्रव्यदानं महत् दत्तम्
ग. श्री. खैरं नमाम्यहम्।।

रचयिता : श्रीराम बाळकृष्ण आठवले

गीतेचा हा प्रभाव ऐसा..

उत्साहाने जीवन जगता हसायचे हसवायाचे
गीतेचा हा प्रभाव ऐसा पाउल पुढती पडायचे!ध्रु.

जे ओघाने काम येतसे आज्ञा हरिची समजावी
कृष्णच कर्ता फल कृष्णार्पण गीतामुरली ऐकावी
चुकलो त्याची खंत न करता चुका सुधारत शिकायचे!१

जीवन आहे कुरुक्षेत्र हे करावयाचा संग्राम
स्मरून कृष्णा झुंज झुंजुनी गाठू मुक्तीचे धाम
अभ्यासाने चंचल मन हे श्रीरामी रमवायाचे!२

सद्गुण पांडव दुर्गुण कौरव परि यश:श्री सत्याची
कर्तव्याचे पालन धर्मच ध्वजा फडफडो धर्माची
धनंजयाचा कृष्ण सारथी तो अपुला आपण त्याचे!३

विसंवाद जरि भवती भरला सुसंवाद साधायाचा
काटे काढुन पुष्पे वितरत मार्ग सुखदसा करायचा
कर्मच आहे सुंदर साधन गीताजीवन जगण्याचे!४

नव्हे देह मी, मी विश्वात्मक मर्यादा नच आत्म्याला
सोsहं घोषे मनगाभारा गुरुकृपेने घुमघुमला
लेप न कसला मनास लागो नभापासुनी शिकायचे!५

रचयिता: श्रीराम बाळकृष्ण आठवले
०४.०१.१९९२

गीतेचा हा प्रभाव ऐसा
👆🏻 ऑडिओ 

ज्ञानदेव गाता ओवी...

निवेदन:
नेवासे गाव,
चारी भावंडं येथील परिसरात रमली.

ज्ञाना, भगवद्गीता ग्रंथ इतका काळ संस्कृत भाषेच्या अवगुंठनात दडलेला.  सामान्य जनता अध्यात्माला भुकेलेली आहे. तिची क्षुधा शमव.

हे आवाहन हृदयापर्यंत पोचलं - ओव्यामागून ओव्या स्फुरु लागल्या, झरू लागल्या. 

सच्चिदानंद बाबा मोठ्या आनंदाने लेखकु झाला.
ज्ञानदेव ओव्या गात होते .. आणि भवताली?.....

*****

ज्ञानदेव गाता ओवी गंध सुवर्णाला यावा
सडा स्वरांचा शिंपावा अर्थ कस्तुरीचा व्हावा

ज्ञानदेव गाता ओवी नीज मुक्ते लागी यावी
माउलीची स्निग्ध माया तिच्या अंतरा लाभावी

ज्ञानदेव गाता ओवी निवृत्तीते व्हावा मोद
सोपानास सोपे व्हावे अर्थगर्भ चारी वेद

ज्ञानदेव गाता ओवी माय मराठी डोलावी
घास घेत सोनुल्याचा तया सवे सान व्हावी

ज्ञानदेव गाता ओवी कृष्ण मेघ खाली यावा
भावभक्तिचा ओलावा तया हवा हवा व्हावा

ज्ञानदेव गाता ओवी मोहुनिया मुकुंदाने
धरूनिया अधरी पावा घुमवावी राने वने

ज्ञानदेव गाता ओवी धरा अमृता नहावी
गात्र गात्र व्हावे रसना भावमाधुरी चाखावी

ज्ञानदेव गाता ओवी लाभे प्रसाद प्रसादा
शांत रसाच्या धारेत तृप्त शांत होते वसुधा


श्रीसंत ज्ञानेश्वर (कथाकाव्य)
रचयिता : श्रीराम बाळकृष्ण आठवले

गीतमुकुन्द - गाठणे सन्मित्राचे धाम

शिरी टोपली, मुखी श्रीहरी
वदनी मंगल नाम
गाठणे सन्मित्राचे धाम!ध्रु.

प्रहरी निद्रित दिसता सगळे
साहस चित्ती गोड हासले
अमोल ठेवा जपुन न्यायचा
हेच अलौकिक काम!१

दुथडी भरुनी वाहे यमुना
थांग तिचा कोणास कळेना
लव न थांबता पुढे चालणे
ठाउक ना विश्राम!२

यमुने का गे अशी खवळसी
दृढ निर्धारा भीति दाविसी
हृदयी दाटले साहस गाते
मुनिवर घोषित साम!३

इकडे पाणी तिकडे पाणी
रुद्ध ना परी माझी वाणी
अंतरातला भाव सांगतो
संरक्षक श्रीराम!४

टोपलीतले बालक इवले
मुखी आंगठा चोखत पडले
पादस्पर्शे यमुना शमली
खुद्कन् हसला श्याम!५

सर्वेश्वर तर पाठीराखा
पार लावतो श्रद्धा नौका
दिसले गोकुळ कंठ दाटला
पूरित मंगलकाम!६
गाठले सन्मित्राचे धाम

गीतमुकुन्द
रचयिता : श्रीराम बाळकृष्ण आठवले

कृष्णजन्माष्टमी

वद्य अष्टमी भयाण तिमिरी
कोसळती जलसरी
त्रिभुवनसुंदर बालक चिमणे
देवकिच्या उदरी!ध्रु.

प्रकाश येता तिमिर लोपला
खेद निमाला हर्ष कोंदला
अंतराळि उसळती अचानक
सुरेल स्वरलहरी!१

लोभसवाणे बाळ चिमुकले
सरळ नासिका काळे डोळे
नीलवर्ण जणु नीलकमल की
फुलले कासारी!२

माय देवकी होता उन्मन
सावध होता उचंबळे मन
भावभरे गदगदुनि गातसे
आज जन्मला हरी!३

लगबग उठुनि अंकि घेतले
अश्रुसरींनी न्हाउ घातले
स्पर्श सुखावह घडता लहरे
अंगांगी शिरशिरी!४

जन्मांतरिची मम पुण्याई
चिंता कसली उरली नाही
सुकुमारा आलास आज तू
बोले भिजल्या स्वरी!५

चुंबचुंबिते ती बाळाला
प्राणपणे रक्षिण्यास त्याला
गाय जणू की वाघिण झाली
दृढ जी निर्धारी!६

खुशाल येवो कंस दुरात्मा
आज पाठिशी मम परमात्मा
भावविवश देवकी आवळुन-
हृदयी तान्ह्या धरी!७

रचयिता : श्रीराम बाळकृष्ण आठवले

रामकृष्ण चालले....

नश्वर देहा टाकुनि मागे
रामकृष्ण चालले! रामकृष्ण चालले!ध्रु.

व्यक्ताव्यक्ती ईश्वर भरला
स्थलकालाच्या अतीत उरला-
मर्त्य शरीरे हे अनुभवले.....१

कामिनिकांचन मोह त्यागिला
अहंभाव तो पूर्ण नाशिला
वाण सतीचे करी घेतले.....२

चारित्र्याचे कमळ फुलावे
आत्मौपम्ये विश्व पहावे
आचरणाने असे बोधिले.....३

धर्माची जगि एकवाक्यता
ऐसा अनुभव आला चित्ता
धर्माचे एकत्व वर्णिले.....४

रचयिता : श्रीराम बाळकृष्ण आठवले

श्रीरामचंद्रांची भूपाळी..

रघुकुलतिलका श्रीरघुनाथा गातो भूपाळी
पुढती मागे, राहुनिया नित दासा सांभाळी!ध्रु.
असे वाटते नील नभाने वर्ण तुझा घेतला
दिनकर गगनी तुझ्याच तेजे आहे झगमगला
रघुपति राघव नाम आळवित वाजतसे टाळी!१
पवनसुत उभा हात जोडुनी तत्पर सेवेला
अजपाजप जो असे चालला कोणी मोजियला
आत्मारामा प्रकट अंतरी प्रार्थित या काली!२
तू  देवासी सोडविणारा ऐसी तव कीर्ती
तुझाच महिमा शब्दोशब्दी रामदास गाती
हे घननीळा, परमकृपाळा प्रेमे कुरवाळी!३
कलियुगात तू रूप घेतले रामा नामाचे
नाम साजिरे तुझ्या कृपेने रसनेवर नाचे
अरूप जरि सुस्वरूप दर्शन मजला दिपवाळी!४
सोsहं सोsहं घोष घुमतसे मनगर्भागारी
गुरुकृपांकित सूक्ष्म रूप तव पापतापहारी
ओढ आतुनी जादूगारा सांग कशी लाविली?५
आता मजला पुरता विरवी तुझिया नामात
ध्येय ध्याता ध्यान त्रिपुटि ही लोपवि निमिषात
भावभक्तिची शरयू रामा अंतरि झुळझुळली!६
रघुकुलतिलका अध्यात्माच्या अंगणि नेऊन
अंगुलि धरुनि चालव संगे आई होऊन
श्रीरामाशी आस न दुसरी साद आर्त घाली!७

रचयिता : श्रीराम बाळकृष्ण आठवले
२.२.१९७७

भूपाळी ऑडिओ

मना तू चाल भक्तिपंथे..

चाल भक्तिपंथे! मना तू चाल भक्तिपंथे!ध्रु.

श्रवण करी, मनन करी
मनन करुनि कीर्तना करी
आनंदचि भेटे!१

निंद्य त्याज्य ते दे दे टाकुन
एक एक गुणसुमना वेचुन
हरिला वाहू दे!२

भावभरे तू कर पारायण
आचरणे हो नर नारायण
घे प्रत्यय येथे!३

रचयिता : श्रीराम बाळकृष्ण आठवले

मना तू चाल भक्तिपंथे..
👆🏻 ऑडिओ

रामनाम जपावें....

रामनाम जपावें, रामनाम जपावें, रामनाम जपावें रे
रामरूपि लपावे, रामरूपि लपावे, रामरूपि लपावे रे!

तो त्रयोदशाक्षरी मंत्र
भक्तांच्या मस्तकी छत्र
भवभय सरावें, भवभय सरावें, भवभय सरावें रे!१

जन्म नि मृत्यु हे भास
"मी अजर अमर" विश्वास
गुरुपदि रमावें, गुरुपदि रमावें, गुरुपदि रमावें रे!२

ज्ञानेच व्हायचे गुप्त
ही आस असू दे सुप्त
रामरंगि रंगावें, रामरंगि रंगावें, रामरंगि रंगावें रे!३

रचयिता : श्रीराम बाळकृष्ण आठवले

रामनाम जपावे..
👆🏻 ऑडिओ

मनातला सुविचार येवो कृतीत...

श्रीसत्यनारायण पूजा मनात
मनातला सुविचार येवो कृतीत!ध्रु.
सत्य हाच नारायण मन बोलले
नारायण नारायण स्मरण चाले
विचार नि आचारही सुसंगतीत!१
सत्य जीवाचे कल्याण मनाची शांती
वासुदेव कृपेनेच समाधि स्थिती
नको खटाटोप काही सोपी ही रीत!२
दिसे भासते ते जाते गाठ बांधावी
आजवर बाळगली अढी सोडावी
उकलती कोडी सारी निमिषार्धात!३
नर होय नारायण गुण जोडावे
निर्धाराने जाती दोष त्वरे त्यजावे
नामस्मरणे पालट होई वृत्तीत!४
शांत झोप तेव्हा लागे जेव्हा सत्कार्य
परिश्रमे सुधा गमे नित्याचे खाद्य
बीज रुजते पुण्याचे शिशुपणात!५
सत्यनारायण व्रत मने करावे
आत्मनिरीक्षणा सिद्ध नित्य असावे
मार्गदीप सर्वांसाठी ध्रुव प्रल्हाद!५
लोकमान्य महात्मा नि स्वातंत्र्यवीर
सेनापति नेताजीही सारे सुधीर
आपणही चोखाळावा मार्ग प्रशस्त!६

रचयिता : श्रीराम बाळकृष्ण आठवले
२७.०८.२००१

टिळकांचे हे दर्शन....

टिळकांचे हे दर्शन
मौनातुन संभाषण!ध्रु.

गीतेचे भाष्यकार
राष्ट्राचे शिल्पकार
बिजलीचे जणु नर्तन!१

नेत्रांनी वेध घेत
ऐक्याचा मंत्र देत
व्यक्तीचे हो विकसन!२

समरसता सकल कळे
दीक्षा ही आज मिळे
तादात्म्यच संजीवन!३

व्हा शिक्षक संपादक
संस्थेचे संचालक
प्रात्यक्षिक अध्यापन!४

लाभाविण प्रीत कशी
आज मला मिळत अशी
मिटले हे सजल नयन!५

रचयिता: श्रीराम बाळकृष्ण आठवले