योगेश्वर श्रीकृष्णाची आरती ..

आरति गाऊ चला सुजनहो
योगेश्वर श्रीकृष्णाची!ध्रु.

सुखदुःखांकित असते जीवन
शांत मनाने ते स्वीकारून
कला शिकू या हसतमुखाने
समूहजीवन जगण्याची!१

भगवद्गीता हरिची मुरली
अभ्यासाने मनात मुरली
नको फलाशा कर्म घडावे
खूणगाठ ही यज्ञाची!२

धर्माहुन ना वरिष्ठ काही
वस्तु व्यक्ति वा गौणच राही
सदाचरण धर्माचा पाया
शिकवण ही यदुवीराची!३

इथे जन्मलो तनमन झिजवू
कार्य संपता निघून जाऊ
आसक्तीला कुठला अवसर?
नव्हेच वार्ता मोहाची!४

कामक्रोध हे कौरव कपटी
दास तयांचे सदैव कष्टी
दैवी संपद् जोडत जावी
हीच आस श्रीरामाची!५

रचयिता : श्रीराम बाळकृष्ण आठवले
२४.७.१९९५

अवजड गिरि पेलून धरू..

गोवर्धन गिरिधारी नेता, गोपगडी सहकार्य करू
नेटाने या काठ्या लावुन अवजड गिरि पेलून धरू!ध्रु.

पर्वत अडवी मेघांना मग मेघ कसे धारा होती
सुजला सुफला सस्यश्यामला होते कृष्णासम धरती
गाई हिरवा चारा चरती, ऋण या गिरिचे सतत स्मरू

पाहिला न जो इंद्र कधी तो जो देवांचा स्वामी असे
त्याहुनि हा गिरिराज जवळचा नेत्रांना प्रत्यक्ष दिसे
प्रदक्षिणा या गिरीस घालू, सृष्टीकार्य ध्यानात धरू

यज्ञाचा तो अर्थ कळाला मोहाचा या होम करू
जय गोवर्धन तृणसंवर्धन गिरिराजाचा घोष करू
व्यक्ती व्यक्तींचा जनसागर संघकार्य हे सुरु करू

संकटात लागते कसोटी कृष्ण कसा ठाके ठाम
स्थैर्य धैर्य ते शिकवी सकलां नंदाचा मुलगा श्याम
मेघश्यामा पाहुन मेघहि सौम्यरूप लागले धरू

चमत्कार ना ही हरिलीला श्रद्धेने हे कार्य घडे
मति हो कुंठित तेथे भक्ती उपयोगाला सहज पडे
शक्तियुक्तिचा सुंदर संगम साक्षी सगळे गोप ठरू

रचयिता : श्रीराम बाळकृष्ण आठवले
५.८.१९९५

समाधान वस्तूपलीकडे आहे

मला हे हवे रे, मला ते हवे रे
मने घोकले हे सदा सर्वदा रे
असे हावरी हाव जाणूनि घे रे
चुकेना जिवाला असंख्यात फेरे!१

समाधान ते काय वस्तूत आहे?
दिसे भासते सर्व जाणार आहे -
अरे साधका 'सार' शोधून पाहे
तुझा राम आतून हे सांगताहे!२

नको धावणे, शीणणे, कष्टि होणे
नको ते जिवाला सदा डाग देणे
सदा धावते त्या मना आत नेणे
मना शांतवाया सुखे नाम घेणे!३

जसा देह येई, तसा देह जाई
न येणे न जाणे शिवाला कधीही
समाधान ते का कधी सांगता ये
जरा स्वस्थ होऊन भोगून पाहे!४

असे जो विरागी विवेकी विचारी
जरी तो प्रपंची तरी ब्रह्मचारी
महादेव कैसा मना तू विचारी
अरे नाम घे होइ मोक्षाधिकारी!५

रचयिता : श्रीराम बाळकृष्ण आठवले
२०.४.१९९०

येशु ख्रिस्त..

या येशूचे हेच सांगणे -
'परस्परांवर प्रेम करा!'
भगवंताच्या आज्ञेने मी
सर्व  बोलतो हृदयी धरा!

मी तुम्हा विश्रांती देतो या अवघे माझ्यापाशी
माझ्यापासुन शिका सर्वजण जाणा जाणा अविनाशी
मला अनुसरा दूर कराया
अज्ञानाच्या अंधारा!

झाले गेले विसरून जावे ते गतमार्गे जाऊ दे
भगवंतावर हवा भरवसा मी माझेपण लोपू दे
जीवन मृत्यू मी तर दोन्ही
जो विश्वासे शिष्य खरा

'प्रेम' तेवढा शब्द असू दे जाता येता ध्यानात
नेम न याचा येइन केव्हा देव जागवा हृदयात
भगवंताचा मार्ग स्वये मी
निर्धारे चालाच जरा

पश्चात्तापे पाप संपते सुधारणा सत्वर होते
त्यागे जागे दयाभावना क्षमा मना शांती देते
प्रसन्नतेने सहन करावे
आतुन वाहे धैर्यझरा!

रचयिता : श्रीराम बाळकृष्ण आठवले

आनंदाचा कंद अंतरी..

आनंदाचा कंद अंतरी स्वरूप त्याचे नाव असे
सगुण नि निर्गुण आत्मरूप ते वदनावरती स्मित विलसे
नव्हे देह मी मन बुद्धि न मी तो मी तो मी जाणवले
अभ्यासाला लाग बालका गुरुमातेने जागवले
पहावयाचे आपण अपणा याला म्हणती अध्यात्म
शोध अंतरी नित्य घ्यायचा घोळवीत वदनी नाम
का मानावे क्षुद्र आपणा झाले गेले विसरावे
जनार्दनाच्या सेवेसाठी चंदनसम तन झिजवावे
बारावा अध्याय कळाया भावार्थाची धर गीता
अंतरि भवती हरि भरलेला प्रपंच परमार्थच होता
उमेद काही अशी बाळगी रडणे कण्हणे सोडुन दे
उत्साहाने चाल बोल तू पुढचे पाउल पुढे पडे
स्वरूपात जो नित्य राहतो स्वधर्म त्याने आचरिला
हात देतसे पडलेल्याला नारायण तेथे दिसला
ध्यानकेंद्र प्रत्येकच व्यक्ती गुरुकृपांकित अनुभवितो
स्वामी असती पुढे नि मागे अढळ भाव तो बाळगतो
कसे व्हायचे काय व्हायचे स्वामी बघुनी घेतील
अनुसंधाना सुटू न द्यावे राखायाचे तुज शील
गुरुनिष्ठेचे कवच चढविता प्रहार घे छातीवर तू
कृष्ण स्मरुनी क्षणोक्षणी बघ झुंज झुंजता विजयी तू
जे कळते ते विवरत जाता शिक्षण अपुले होत असे
आचरणाने तत्त्व उजळते कृतार्थता मग वाटतसे
विरंगुळा हा असाच असतो अनुभव घे देता देता
जमेल तितके बोलुन घे रे श्रीहरि असतो बोलविता

रचयिता - श्रीराम बाळकृष्ण आठवले.
१६.७.१९९५
आनंदाचा कंद अंतरी (audio)

आरती श्रीमहाराजांची!

आरती श्रीमहाराजांची! नामाची!
नामावरल्या प्रेमाची!ध्रु.

श्रीराम जय राम जय जय राम
येता जाता घ्यावे नाम, मन सुखधाम
गुरुकिल्ली आनंदाची!१

प्रपंच परमार्थाची शाळा
शिकण्यासाठी जन्म आपला
हौस नवनवे शिकण्याची!२

दोष न बघता, गुणच बघावे
गुणच बघावे सांगत जावे
ही पूजा श्रीरामाची!३

प्रवचन वाचन तसे आचरण
रघुरायाचे प्रसन्न दर्शन
शिकवण श्रीमहाराजांची!४

गोंदवले ये घरी आणता
नाम स्मरता पावन होता
कृतार्थता लाभायाची!५

रचयिता : श्रीराम बाळकृष्ण आठवले
१५.७.२०००

नमस्कार साष्टांग भास्करा..

नमस्कार साष्टांग भास्करा -
आरोग्याचे दे वरदान!
गाऊ आम्ही तेजोगान!ध्रु.

कर दोन्ही हे सहजच जुळता
कळे तनाची एकवाक्यता
पाय ठाकती ठाम धरेवर
ॐकाराचे स्फुरते गान!१

शरीर बिजलीसम लवलवते
आनंदाची लाट उसळते
सकल अवयवा गती लाभता
प्रगतीचा चढतो सोपान!२

श्वसनावर लाभते नियंत्रण
आरोग्याला हेच निमंत्रण
सदा सर्वदा योग रवीशी
नमस्कार दे लाभ महान!३

रचयिता : श्रीराम बाळकृष्ण आठवले
१९.५.१९९०

आस ही झाली पुरी!

सूड घेणे! सूड घेणे! आस ही झाली पुरी!
श्रीअनंते अंत केला जाचकाचा सत्वरी!ध्रु.

दास्य जेथे तेथ वीरा पंथ केवळ हा असे
शस्त्रचारी कर्मवीरा मृत्युभय लवही नसे
तो हुतात्मा प्राणदाने आळवीतो श्रीहरी!१

धरणिकंपहि ना जरी हा, आंग्लभूमी हादरे
शासकांचे चित्त शंकित होतसे परि बावरे
हा बटू जरी आज कीर्ती पोचलीसे अंबरी!२

'शारदा' जे नाट्य होते त्याहुनीही वेधक
नाट्य घडले मंदिरी त्या साक्ष होते प्रेक्षक
कीचकासी भीम वधितो चित्र बिंबे अंतरी!३

शत्रु शासक जरि गुणी हो त्या गुणा ना चाटणे
जहर जरि ते सेविले बुद्धि अपुली मारणे
वध्यता त्या जाचकाची वीर ना क्षण विस्मरी!४

फूल कोमल जे असे वज्र आता जाहले
लोहिताने विक्रमाचे पान अवघे रंगले
रक्तस्नाता मातृभूमी हासली चित्ती परी!५

चंद्र जो भासे जनांना तळपला भानूपरी
मार्ग उजळे आत्मतेजे संपवी तो शर्वरी
अर्घ्य म्हणुनी भास्कराते वाहिल्या अश्रूसरी!६

कोणि ना भुलवू शके देश सारा जागला
दास्य देणे दूर फेकुन चंग त्याने बांधला
वानगी ही निश्चयाची जाण देण्यासी पुरी!७

रचयिता : श्रीराम बाळकृष्ण आठवले

गोसावी सजला! मोरया गोसावी सजला

अंगि शोभली भगवी कफनी
कंठी रुद्राक्षांची माळा
कमंडलू घेताक्षणि हाती
गोसावी सजला! मोरया गोसावी सजला! ध्रु.

दीक्षादाता श्रीगजानन
कानी केले मंत्रोच्चारण
प्रेमभराने पद्महस्त तो अंगावर फिरला!१

ग्रामी फिरती, मंदिरि जाती
तेज आगळे वदनावरती
जीवदान अन् दीक्षादानहि एकचि समयाला!२

मयुरेश्वर  प्रकटे त्याकाली
मातापितरे कृतार्थ झाली
प्रेमाश्रूंनी चिंब भिजविले निजसर्वस्वाला!३

गंडांतर हे कैसे टळले?
प्रभुलीला कोणास आकळे?
भट्ट न पदवी, गोसावी पद रुचे मोरयाला!४

रचयिता : श्रीराम बाळकृष्ण आठवले
पूरिया, त्रिताल

स्वभाव पाहु या....

तटस्थ होउन आपण अपुला स्वभाव पाहू या!
राम नि रावण काय व्हायचे आधी ठरवू या!ध्रु.

विकारवश तो रावण झाला संयम मग सुटला
विचार करता राम जीवनी संयम शिकलेला
तोल मनाचा राखायाला भक्तीने शिकु या!१

देहामध्ये रावण दडला अंतरात नाम
नाम स्मरता सरे वासना प्रकटे श्रीराम
निर्धाराने आपण अपुला स्वभाव बदलू या!२

अहंकार जणु मद्य प्राशुनी रावण उन्मत्त
विनम्रता ती रामापाशी मोहित करी चित्त
हवे हवेसे सकला आपण सत्वर होऊ या!३

दशाननाला स्वार्थाने त्या नष्टभ्रष्ट केले
त्यागाने श्रीरामाला त्या उंच उंच नेले
सर्वात्मकता श्रीरामाची आपण मिळवू या!४

सत्तेसाठी रावण जगला जीवन ते कसले?
सेवा करुनी रामराय तर मनोमनी आले
भक्तिदीप हा करी घेउनी वाटचाल करु या!५

कामुकता त्या दशाननाची मुख झाले काळे
वैराग्याने श्रीरामाचे जीवन ते उजळे
नामासक्ती विषयि विरक्ती आपण मिळवू या!६

तमोगुणाने दूषित रावण अंत कसा त्याचा
सत्त्वाचा श्रीरामच पुतळा भाव कसा त्याचा
सत्य शिवाचे सुंदरतेचे पूजन हो करु या!७

बहिर्मुखाला भविष्य कसले त्याचा हो नाश
अंतर्मुख श्रीरामच आत्मा जाणा अविनाश
देहातुन त्या देवदिशेला पुढती जाऊ या!८

जीवनभर अन्यायच केला रावण ना राजा
न्यायासाठी राघव लढला जनतेचा राजा
विकार हटवुन विचारास त्या अवसर देऊ या!९

राम नि रावण दोघे मानव अंतर परि मोठे
कृती देव की दानव ऐसे मनुजा दाखवते
विवेकास त्या संगे घेऊन उन्नत होऊ या!१०

राम राम म्हणताना वाल्या अतरंगि वळला
करुणासागर शब्दप्रभु श्रीवाल्मिकी बनला
सुधारण्याची संधी आपण आधी साधू या!११

नारद करती सावध सकलां सावध ते तरले
बेसावध ते प्रलयामाजी भले भले बुडले
आशिवातुन या जिवास आपण शिवा भेटवू या!१२

'मेरा मेरा' विसरायाचे 'तेरा' हे गाऊ
झाले गेले विसरायाचे सावधान राहू
उत्साहाने श्रद्धेने हो रामा आळवु या!१३

रचयिता : श्रीराम बाळकृष्ण आठवले
१२.०१.१९९०

रघुपति राघव राजाराम, पतितपावन सीताराम..

रघुपति राघव राजाराम, पतितपावन सीताराम!

आपण सारे गजर करू,
भवसागर हा सहज तरू
उत्साहाला पुरवी राम, पतितपावन सीताराम!१

मधुर बोलणे बोलावे
मधुर हासणे विलसावे
धागा अखंड विणतो राम, पतितपावन सीताराम!२

मर्यादा आतुन कळते
मी माझे हे मावळते
समंजसपणा दे श्रीराम, पतितपावन सीताराम!३

हात द्यायचा बुडत्याला
हसवायाचे रडत्याला
प्रेमाची शरयू श्रीराम, पतितपावन सीताराम!४

ज्ञान नेमके आत असे
आचरणातुन दिसत असे
ज्या त्या हृदयी आत्माराम, पतितपावन सीताराम!५

कधी ऊन, सावली कधी
कधी कष्ट, आराम कधी
सुखदुःखांचा काला राम, पतितपावन सीताराम!६

रचयिता : श्रीराम बाळकृष्ण आठवले
१७.३.२०००

रघुपति राघव राजाराम.. ( ऑडिओ )

गुरुमहाराज गुरु, जय जय परब्रह्म सद्गुरु..

गुरुमहाराज गुरु, जय जय परब्रह्म सद्गुरु!ध्रु.

नाम स्मरता मन गहिवरते दत्तराज दिसले
तीन मुखे, कर सहा कसे ते सुंदरसे हसले
धुंद केवडा सुगंध उधळे अनुभूती आदरू!१

गुरुचरिताची चटक लावती घडते पारायण
श्रवणी पठणी श्रीगुरु लीला सद्गुरु गुणगायन
दुःख पळाले दूर दूर करु नामस्मरण सुरू!२

उगाच का हो कष्टी व्हावे, कोंडुनिया घ्यावे
समाजात जर मिसळुन गेला मन हलके व्हावे
सेवा साधन उजळवि तनमन श्रीगुरु करुणाकरू!३

जटा जूट शिरि काखे झोळी पायि खडावा हो
भस्मविभूषित काया अवघी गंगा उसळे हो
गाय तयांच्या पाठीमागे दीनबंधु श्रीगुरु!४

आधी हातालागी चटके मग मिळते भाकरी
तळमळ वाढे अतिशय अंती दिसे चक्रधारी
श्रीरामाच्या लेखणीतुनी गीत लागले झरू!५

रचयिता : श्रीराम बाळकृष्ण आठवले
४.११.१९९७
गुरुमहाराज गुरु जय जय
👆🏻 ऑडिओ

सागरा विनवितो जलराजा घरि घेउनि जा..

सागरा विनवितो जलराजा,
घरि घेउनि जा, घरि घेउनि जा!ध्रु.

उसळत लाटांवरती लाटा
परी बुजविती सगळ्या वाटा
तूच आणिले वचन देउनी
वचना स्मरुनी घेउनि जा!१

ओढ लागली मायभूमिची
तगमग सांगू कशी मनीची
ओघळलेले अश्रु मिसळतिल
मिसळुनि वदती घेउनि जा!२

पंजरात शुक हरिणहि पाशी
फसगत झाली माझी तैशी
विरह न पळभर मला साहवे
दुवा घ्यावया घेउनि जा!३

आंग्लभूमि ना मना मोहवी
मायभूमि मज जवळ बोलवी
सरितेच्या विरहाची तुजसी
शपथ घालतो घेउनि जा!४

विकल अवस्था मुकीच वाचा
भार निरर्थक मम विद्येचा
कैसा भुललो मती गुंगली
एकच धोषा घेउनि जा!५

आळवणी जर तू न ऐकशी
सांगिन तत्क्षणि अगस्ति मुनिशी
आचमनी एकाच प्राशतिल
मनी उमजुनी घेउनि जा!६

रचयिता : श्रीराम बाळकृष्ण आठवले

सागरा तुजसि विनवितो, ने परतुनि भारतभूला

मदनलाल धिंग्राच्या क्रांतीकृत्यानंतर सावरकरांना इंग्लंडमध्ये फार त्रास सहन करावा लागला आणि त्यातच भारतभूच्या विरहाचं दुःख. अशाच एका विषण्ण मनस्थितीत सावरकर ब्रायटनच्या सागरतीरावर उभे होते.  छे एक महाकवी उभा होता.  महाकवीच्या महान अंतःकरणातील भावनांचं आंदोलन महासागराशिवाय कोणाला समजणार? सागराच्या किनाऱ्यावर लाटा उचंबळत होत्या.. आदळत होत्या.. आणि इकडे मनाच्या काठावर देशप्रेमाच्या, स्वातंत्र्य भक्तीच्या लाटा उचंबळत होत्या. 

सावरकरांनी सागराला साद घातली - सागरा तुजसि विनवितो
--------------------------------------

सागरा तुजसि विनवितो,
ने परतुनि भारतभूला!ध्रु.

लाटा किती खळखळ करती
तीरावर येउनि फुटती
बनुनी फेन परतुनि जाती
सागरा प्राण तळमळला!१

मज शब्द एक वदवेना
मातृभूविरह सहवेना
अश्रुसरी या मुळि न थांबती
शोकाग्नि चित्ति भडकविला!२

का निर्दय होउन हसशी?
उद्दामपणे खिजवीशी
तू ऐकले न जर, याच क्षणी-
मी कथिन अगस्ति मुनीला!३

आठव श्रीरामशराते
आठव ऋषि आचमनाते
मत्प्रिय बंधो, करुणासिंधो
चल घेउनि माहेराला!४

रचयिता : श्रीराम बाळकृष्ण आठवले

नाते पतिपत्नींचे

नर नारी या पलिकडचे
ते नाते पतिपत्नींचे!ध्रु.

दोन देह परि एकच आत्मा
देहांच्या लंघुनिया सीमा
मने मनाला जोडत जुळवत
फुलता फुलवायाचे!१

ते सोशिकपण डोळस ममता
गुणग्रहण चित्ताची समता
दोष न बघता सावरताना
दर्शन शिवशक्तींचे!२

उपभोगाची नुरे लालसा
राम अंतरी असा भरवसा
या संसारा भजन समजुनी
गाता रंगायाचे!३

वेलीवरती फुले उमलती
आपण हसती जनां सुखवती
सद्गुण सौरभ दूर दरवळो
स्वप्न सत्य करायाचे!४

विश्वासावर समर्पणावर
आस्वादावर, त्या त्यागावर
संतोषाचे निशाण सुंदर
फडकत ठेवायाचे!५

रचयिता: श्रीराम बाळकृष्ण आठवले
(राग मांड)
३०.९.१९९४

श्री अरविंद

जीवनात यावा वेदान्त-
हे स्वप्न धरी मी हृदयात!

तो अनंत अनुभव देतसे
मन पवना बांधुन देत असे
आनंद न मावे गगनात!

जे तये दिले त्याचेच असे
ते तयास द्यावे वाटतसे
दर्शना तळमळे दिनरात!

हे विचार बाहेरुन येती
फेकता तया अंतरि शांती
ये निजानंद नितध्यानात!

मन माझे झाले विश्वमन
हे विश्वच झाले मज सदन
मकरंद भरे अरविंदात!

आदेश आतुनी तो देतो
तो चालवी तैसा मी चलतो
मी कुणी न उरलो जगतात!

रचयिता : श्रीराम बाळकृष्ण आठवले

विवेक हाच खरा मित्र.

विवेक: सर्वजीवानां
मित्रं कारुणिकं सदा।
मोहात् रक्षति सर्वत्र
रक्षाम् कर्तुम् प्रधावति।।

अर्थ : (खरोखर) विवेक हा (सद्गुणच) सगळ्या प्राण्यांचा परमदयाळू मित्र आहे. तो सर्व ठिकाणी (जीवाचे) मोहापासून रक्षण करतो व त्याचे रक्षण करण्यासाठी (वेळीच) धाव घेतो.

रचयिता : श्रीराम बाळकृष्ण आठवले