दयाळू, कृपाळू माझा ज्ञानेश्वर!ध्रु. ज्ञानेश्वर, ज्ञानेश्वर!!

दयाळू, कृपाळू माझा ज्ञानेश्वर!ध्रु.
ज्ञानेश्वर, ज्ञानेश्वर!!

आनंदाचा कंद हा
बोधाचा मकरंद हा
मनाचा मवाळू माझा ज्ञानेश्वर!१

आत्मानंदी दंग हा
भक्ति सागरी डुंबत हा
मायमाऊली ज्ञानेश्वर, ज्ञानेश्वर!२

गीता सांगे सकलांसी
घास भरवितो बालांसी
परब्रह्म हा ज्ञानेश्वर, ज्ञानेश्वर!३

महाविष्णुचा अवतार
सखाच माझा साचार
योगिराज हा ज्ञानेश्वर ज्ञानेश्वर!४

बालपणी जे सोशियले
तेच पुढे ग्रंथी दिसले
सोशिकपण श्री ज्ञानेश्वर ज्ञानेश्वर!५

अद्वयवैभव भोगत हा
नाथपंथिचा यात्री हा
चिंतामणि श्री ज्ञानेश्वर, ज्ञानेश्वर!६

युगांतदुःखा प्राशियले
प्रखर विरागा साहियले
मुळी मुक्त हा ज्ञानेश्वर, ज्ञानेश्वर!७

रचयिता : श्रीराम बाळकृष्ण आठवले

८.९.१९७६

माणुसकीने वाग माणसा साई सांगतो!

माणुसकीने वाग माणसा
साई सांगतो!ध्रु.

हिंदु- मुस्लिम- शीख - इसाई

देह सारखा भेदच नाही

अभेद दाखवितो!१

उदी कपाळी लावा आता

राखच अंती सत्य तत्त्वतः

विरक्ति बाणवतो!२

घेउनि झोळी भिक्षा मागत

निमित्त भिक्षा, दुनिया पाहत

दत्तगुरु फिरतो!३

टोचुन खोचुन नकाच बोलू

खाल कुणाची नकाच सोलू

प्रेमपाठ देतो!४

हृदय मंदिरी देव राहतो

तो चालवितो तोच करवितो

एकनिष्ठ करतो!५

रचयिता : श्रीराम बाळकृष्ण आठवले

११.१०.१९७८
 :  

राम कृष्ण हरि! राम कृष्ण हरि!

राम कृष्ण हरि! राम कृष्ण हरि! ध्रु.

तो आतुनि घेई नाम
करी सोपे सोपे काम
भवभयास देव निवारी!१

मन निर्मळ निर्मळ होई
हरि जवळी जवळी राही
प्रभु भक्ताचा कैवारी!२

जर अखंड चाले नेम
भक्ताचा योगक्षेम
वाहतो स्वये गिरिधारी!३

नम्रता हीच संपत्ती
मुखि माधुर्याची वसती
श्रीहरिची किमया न्यारी!४

जे जे दिसताहे भूत
ते वाटतसे भगवंत
अनुभवा गड्या अवधारी!५

रचयिता : श्रीराम बाळकृष्ण आठवले
१२.१०.१९८६