Sunday, October 10, 2021

मी विद्यार्थी आहे..



ही तर शालामाता माझी
मी विद्यार्थी आहे!ध्रु.
मी विद्यार्थी आहे याचे
भान सदोदित आहे!

आधी वंदन मायपित्यांना
सद्गुरूच ते माझे
जवळी घेते शालामाता 
कौतुक करते माझे
          मी विद्यार्थी आहे!

डोळे मिटता पुढे ठाकते
भगवंताची मूर्ती
मौन पाळता ध्यान साधते
प्रसन्न होते स्फूर्ती
            मी विद्यार्थी आहे!

मी नच माझा, मी सगळ्यांचा
सांगे शालामाता
विज्ञानासह भाव फुलविते
माझी शालामाता
               मी विद्यार्थी आहे!

संयम आणि शिस्त पाळता
हसते शालामाता
ज्ञान घ्यावया उत्सुक होता
भरभरूनी दे माता
              मी विद्यार्थी आहे!

शाला नाही दगड विटांची
चैतन्याचा स्त्रोत
पराक्रमाची कला गुणांची
गंगोत्री ही होत
तिचा पुत्र मी होत - 
             मी विद्यार्थी आहे!

रचयिता : श्रीराम बाळकृष्ण आठवले
९.१.१९८२

Thursday, October 7, 2021

देवीपुढे बसावे..



देवीपुढे बसावे, ध्यानी तिच्या रमावे!ध्रु.

मिटताच दोन डोळे
मूर्ती तिची झळाळे
ते ध्यान पाहताना स्थलकाल विस्मरावे!१

राणा प्रताप शिवजी
ठरले रणात गाजी
देवी तुझ्या कृपेने चैतन्य ते स्फुरावे!२

जाणूनि भाव माझा
ऐसा न भक्त दूजा
जे बोलणे तियेचे माझ्याच कानि यावे!३

शस्त्रे हवीत माते
निजकार्य साधण्याते
दिपवी जगास ऐसे माझ्या करी घडावे!४

जरि रौद्र क्रुद्ध मुद्रा
मज माय ही सुभद्रा
सौदामिनीच देवी ते तेज अंगि यावे!५

जननी सुपुत्र नाते
भीती मना न शिवते
चित्ता मिळो विसावा देवीस नित्य ध्यावे!६

बलवंत, कीर्तिवंत
गुणवंत, ध्येयवंत
वाटे मनास माझ्या मी विश्वव्यापि व्हावे!७

रचयिता : श्रीराम बाळकृष्ण आठवले

Sunday, October 3, 2021

दुःख दडवावे, सुख दाखवावे..

दुःख दडवावे, सुख दाखवावे
"देहदुःख हेच सुख" सुखे समजावे!ध्रु.

माझे दुःख, माझे सुख विचार हा कोता
सुखदुःख विश्वाचे हा भाव असे मोठा
'घडे ते ते कल्याणाचे' सूत्र उमजावे!१

नसे अंत वेदनांना - नये देऊ लक्ष
नाम घेई राम त्याचा राम घेई पक्ष
आत्माराम आत राहे तिथे लक्ष द्यावे!२

सांजवेळ वाटे जेव्हा जोड दोन्ही हात
मिटोनिया डोळे राजा राहणे निवांत
समाधान ज्याचे त्याने पदरात घ्यावे!३

जन्ममरण त्याच्या हाती शिरी भार फोल
देहभाव सरला त्याचा सावरला तोल
ज्ञानोबाच्या, तुकोबाच्या संगती राहावे!४

रचयिता : श्रीराम बाळकृष्ण आठवले
१३.१२.२००३

Saturday, October 2, 2021

अटलजींवरील हिंदी कविता

खडे रहो अपने पथ पर तुम
आगे बढने के लिए
याद रखो हो अमृतपुत्र तुम
गीता जीने के लिए।१

मैं विवेक आनंद है मुझ में
आत्मा पर जागृत विश्वास।
प्रकाश नयनों में है उतरा
संथ हुई है मेरी साँस।२

उत्तर दक्षिण पूरब पश्चिम
मातृभूमि पर चरण चले
विचार भारत तथा विश्व का
चिंतन के हैं कमल खिले!३

कृतज्ञ हूं मैं परमेश्वर का
मिली भगिनीयाँ बंधु मिले
सरस्वती आ बैठी जिव्हापर
वच से जन के हृदय हिले।४

हर नरेंद्र स्वामी बन सकता
रामकृष्ण यदि मिल जाए।
प्रभुसेवा जनसेवा सन्मति
कृति कृति में दिख जाए।५

अपने को ना क्षुद्र समझना
कमी यदि है निश्चय की
सत्य यत्न साकार रामजी
कौन बड़ाई तनमन की।६

कवि : श्रीराम बाळकृष्ण आठवले
२४.१२.२००३

महात्मा फुले!

महात्मा फुले! महात्मा फुले!ध्रु.

तेवली ज्योत ज्ञानाची
उजळली मुखे दीनांची
सर्वांचा निर्मिक  डुले!१

सत्याचा करु या शोध
ऐक्याचा होइल बोध
भक्तीचे पिकवू मळे!२

जर शिकल्या लेकी सुना
आनंद न मनि माइना
हे धडे आधी गिरवले!३

मोडाव्या जाती पाती
जुळण्याला रेशिमगाठी
प्रगतीला जग हे खुले!४

रचयिता : श्रीराम बाळकृष्ण आठवले
४.११.२००३

शंकरा आरती गाऊ!

शंकरा आरती गाऊ!
अध्यात्मी अनुभव घेऊ!ध्रु.

अंतरी सद्गुरु वसतो
सद्विचार सहज स्फुरतो
गुरुनाथनाम नित गाऊ!१

बलभीम शिकवितो भक्ती!
मग हव्या कशाला युक्ती?
नित जगाधाकटे होऊ!२

भाविका उद्धरी भाव
ती तारक नामी नाव
समरसून वल्हवू वल्हवू!३

बाह्या नच केव्हा भुलणे
अंतरी जाउनी बसणे
निजरूप सुजनहो पाहू!४

श्रीराम जरी हा दूर
उसळले भक्ति काहूर
आनंद देउ अन् घेऊ!५

रचयिता : श्रीराम बाळकृष्ण आठवले
९.७.१९८१