तयारी

पाठविलेसी म्हणूनि आलो
चल म्हटले की निघायचे
बोट तुझे मी धरायचे! ध्रु.

नाम स्मरता तुझे अनंता
भयचिंतांची कुठली वार्ता?
सोsहं भजनी रमायचे!१

इथले काही नाही माझे
तनमनधन सगळेच हरीचे
भजनाने हे कळायचे!२

राम राम भेटी घडताना
राम राम इथुनी जाताना
नामामध्ये मुरायचे!३

जगण्यामध्ये हवी सहजता
वावरताना हवी अलगता
सहजपणाने सुटायचे!४

कोणी आधी कोणी नंतर
याचा बाऊ करणे कुठवर?
धीर धरूनी जगायचे!५

रचयिता : श्रीराम बाळकृष्ण आठवले.