नरेन्द्रा, तू प्रतीक ध्येयाचे....

अमृतपुत्रा अगा नरेन्द्रा
प्रणाम कोटि जनांचे
तू प्रतीक ध्येयाचे! ध्रु.

तुझिया स्मरणे पौरुष जागे
वैराग्याचे कुंड धगधगे
दर्शन श्रद्धेयाचे!१

निर्भय बनणे तुझेच पूजन
वैदिक जीवन तव संशोधन
गायन कर्तृत्वाचे!२

अज्ञानाचे भस्म होउ दे
समर्थ भारत जगा दिसू दे
मंथन तत्वार्थाचे!३

गुरुदेवांनी दिली प्रेरणा
हे दिग्विजयी तुला वंदना
उद्बोधन धर्माचे!४

निजसामर्थी निष्ठा ठेवू
पुढती पुढती चालत राहू
आश्वासन छात्रांचे!५

रचयिता : श्रीराम बाळकृष्ण आठवले