मनातला सुविचार येवो कृतीत...

श्रीसत्यनारायण पूजा मनात
मनातला सुविचार येवो कृतीत!ध्रु.
सत्य हाच नारायण मन बोलले
नारायण नारायण स्मरण चाले
विचार नि आचारही सुसंगतीत!१
सत्य जीवाचे कल्याण मनाची शांती
वासुदेव कृपेनेच समाधि स्थिती
नको खटाटोप काही सोपी ही रीत!२
दिसे भासते ते जाते गाठ बांधावी
आजवर बाळगली अढी सोडावी
उकलती कोडी सारी निमिषार्धात!३
नर होय नारायण गुण जोडावे
निर्धाराने जाती दोष त्वरे त्यजावे
नामस्मरणे पालट होई वृत्तीत!४
शांत झोप तेव्हा लागे जेव्हा सत्कार्य
परिश्रमे सुधा गमे नित्याचे खाद्य
बीज रुजते पुण्याचे शिशुपणात!५
सत्यनारायण व्रत मने करावे
आत्मनिरीक्षणा सिद्ध नित्य असावे
मार्गदीप सर्वांसाठी ध्रुव प्रल्हाद!५
लोकमान्य महात्मा नि स्वातंत्र्यवीर
सेनापति नेताजीही सारे सुधीर
आपणही चोखाळावा मार्ग प्रशस्त!६

रचयिता : श्रीराम बाळकृष्ण आठवले
२७.०८.२००१